Jowai, Naiwieng 22
Ka shlem treikam u District Sports Officer, West Jaiñtia Hills ryngkat ka jingïatreilang bad ka West Jaiñtia District Sports Association (WJDSA) ka la pynlong ïa ka lympung ïalehkai kaba ar sngi ïa kaba la tip kum ka ‘Open Volley Ball Tournament’ ha madan Biar ka Blai kaba don ha Mission Compound naduh 20 haduh 22 tarik mynta u bnai.
Ha kane ka lympung la wan ïashim bynta da 8 tylli ki kynhun kynthup ïa ka Lion Mission Compound Sports and Youth Affairs, Khimusniang, Ïakrehlang Nangbah SC, Madankynsaw Mowkyn -deng Knorsyiem, Kiang Nangbah Govt. College, Spikers, Chullai Brothers Chutwakhu bad ka Lion Mission Compound Dorbar Shnong.
Ki artylli ki kynhun kiba la poi sha ka thong ban ïaknieh ïa ka nam lahduh ki long ka Ïakrehlang Nangbah SC bad ka Madankynsaw Mowkyndeng Knorsyiem ha kaba ka Madankynsaw Mowkyndeng Knorsyiem ka la lah ban pynliem da 25-15, 25-17 ïa ka Ïakrehlang Nangbah SC.
Ha ka sngi pynkut ïa kane ka lympung la wan sakhilang da u Bah E.M.H Passah, Working President ka WJDSA kum u kongsan ha ka jingdonlang u Bah Khroobok Passah, District Sports Officer, West Jaiñtia Hills, u Bah Patrick Lamare, Vice-President WJDSA, u Bah Lammat-O Laloo, General Secretary WJDSA, u Bah P. Khyriem, u Waheh Shnong Lion Mission Compound bad kiwei kiwei nalor ki nongshah khot sngewbha.
U Bah EMH Passah ha ka jingkren ula ong, ka West Jaiñtia District Sports Association ka thrang bad angnud ban kyntiew ïa ki kam ïalehkai sports hapoh ka District, kumta ula kyntu ïa ki dong ki shnong ban ïashim bynta ha ki jingïakop bapher bapher kiba ka WJDSA ka khot pynlong na ki por sha ki por.
U Bah Khroobok ula ong ba ka jingpynlong ïa kane ka lympung ka long shi bynta ban ïoh ka District ïa ki samla donsap ki ban mihkhmat ïa ka District sha ka Meghalaya Games ka ban long ha Tura naduh ka 15 tarik u Kyllalyngkot 2024.
Shuh shuh, ula ong ba kane ka lympung kan bteng ruh ha ki snem sha ki snem, nalor kata ha kane ka lympung lah ban ïashim bynta da kino kino ki Shnong ne ki kynhun bad ula kyntu ïa ki samla ka District ban shim ïa kane ka kabu ha u snem ban wan.
