Shi snem mynshwa, ka jylla ka la kyndit thret ha ka step jong ka 22 tarik Naiwieng, 2022, hadien ba ki khubor ki la paw halor ka jingshah siat ïap ki san ngut ki ’riew paidbah ha Mukroh, West Jaiñtia Hills ha ki pulit Assam. La don ruh sa uwei u nongtrei ka tnat Forest ka Assam uba la duh noh ïa la ka jingim. Ki dur khih halor kane ka jingjia ki la saphriang kylleng bad tang ba sngap ïa ka jingsawa ki ktang suloi ruh la sngewtriem lypa. Katno ka kthang bad ka pang ka mynsiem ban ïohi ïa kito ki ’riew rangbah kiba la thiah lyngktar ha madan hapdeng ka jinglyngkien ka snam. Ka la long ka jingjia kaba khlem poi pyrkhat eiei khamtam ba ki artylli ki jylla ki la dep ban pynbeit pud ha ki hynriew na ki 12 tylli ki jaka. Ngim lah ruh ban klet ba kane ka jingjia ha Mukroh ka pynkynmaw ïa ngi ïa kaei kaba la jia ha Langpih ha u Jymmang 2010 ha kaba saw ngut ki ’riew paidbah ki la khlad na ka jingshah siat ha ki pulit Assam. Khyndai ngut ki ’riew paidbah ki la khlad ha kti jong ki pulit Assam ha ki 13 snem tam.
Shi snem thik hadien, ngim pat ïohi ba kitei ki lanot kin ïoh ïa ka hok ka jong ki. Dang ha u bnai ba la lah, ha ka jingïalang hapdeng u Myntri Rangbah ka Assam bad Myntri Rangbah ka Meghalaya, la rai ban pyndam noh ïa ki jingtohkit da ki nongbishar ba la thung da ka Sorkar Assam bad Meghalaya namar ki sakhi ki khlem wan mih satia na baroh arliang bad ym shym la lah ban pyndep ïa ka jingtohkit. Hynrei la rai ban aiti noh ha ka CBI ban tohkit, bad ïa ka jingujor yn nym leh ha Shillong lane Guwahati hynrei ha kano-kano ka nongbah kaba long pdeng la ka dei ha Delhi ne Kolkata khnang ba ka jingtohkit kan long ka bym shah liang bad kaba ïaid beit. Tangba haduh mynta kam pat don satia kano-kano ka dak ha kaba ïadei bad kane ka bynta, bad ka kam ka dang shu neh ha suiñ. Ngim tip lano kane ka CBI kan ïoh ban sdang ïa ka jingtohkit bad haduh lano kan shimpor ban pyndep ïa la kamram. Lada slem ka jingtohkit, ki sabut ki lah ban duh ban dam bad kan jynjar ïa ka CBI ba kan buddien. Ha kajuh ka por, ngi sngewthuh ba lada wan ka CBI ban tohkit, kin sa mih bun kiei-kiei kiba lah ban pynkyndit ïa kiba bun.
Hapdeng kane ka shi snem, ngi la ïohi ba ki paid Karbi ha Khanduli bad Lapangap ki la leit ban pynthut ïa ka shongsuk shongsaiñ bad ki la don ruh ki khep ba la mih ka jinghuri hura. Hynrei donbok ba kam shym la don pat kano-kano ka jingïaumsnam, bad ka jingjai-jai ka la wanphai. Nalorkata, ka sorkar Meghalaya bad ka sorkar Assam ki la sdang ïa ka jingïakren ban pynbeit ïa u pud u sam sa ha ki hynriew tylli kiwei pat ki jaka ba kynthup ïa ka Block-I, Block-II, Khanduli-Psiar, Langpih bad kiwei. Kine ki jingïakren ki don ha ki bynta bapher-bapher bad kita ki Regional Committee na Assam bad Meghalaya kiba ïakren kin hap ban ai ïa ki kaiphod sha ki sorkar jylla. Ngi hap ban shu kyrmen ba ka jingïakren kan long kaba jop bad khamtam eh ba ka jingïapynbeit kan long kaba hun bad kaba lah ban pdiang da ki nongshong shnong ha kito ki jaka kiba shah ktah. Hynrei dei ka por ka ban sa batai ïa kine kiei-kiei.
Na ka liang ka sorkar Meghalaya kan hap ban long kaba peitngor ha ki bynta jong ki khappud ïoh jia ba ki mih kum kitei ki jingsngewsih kiba ktah syndon ïa ka jingim briew. Ka sorkar ka dei ban buh ïa ki pulit ki swar jong ka ha ki jaka ba marjan bad u pud u sam khnang ba ki paidbah ha khappud kin ïoh ïa ka jingshngaiñ. Na ka por sha ka por, ki dei ruh ban don ki jingïakren hapdeng ki bor distrik jong kito ki jaka kiba don ha khappud khnang ban weng ïa kino-kino ki jingsngewthuh bakla kiba lah ban ïalam sha ki jingïakynad kiba jur. Ngim kwah shuh ban ïohi ïa ki jaka khappud ba kin long kum ki madan thma ha kaba ki mynsiem jong ki briew kiba lui-lui kin shu shah knieh ei kha-ma-kha ha ki ktang suloi ba khlaiñ bor jong ki pulit. Hashwa ba ka ding kan klang, dei ban lah ban tem noh kham kloi katba lah.
