Chennai, Naiwieng:
Ka jinghap jong u slap uba jur ka la ïai bteng ha kiba bun ki bynta jong ka Kerala, Tamil Nadu bad Puducherry. Ka India Meteorological Department (IMD) ka la ïathuh lypa ban don ka jinghap jong u slap uba jur ha ki dewlynnong kiba don ha Kerala haduh ka 24 tarik, Naiwieng.
Na ka jingïathuh lypa ban don ka jinghap jong u slap uba jur, ka sorkar Tamil Nadu ka la pynmih ïa ka hukum ban khang ïa baroh ki skul sorkar bad ki skul jong ki riewshimet kaba la bteng haduh hynnin ka sngi ha ka distrik Thirunelveli, Kanyakumari, Thoothukudi, Tenkasi, Viruthunagar, Pudhukottai bad Niligiri. Ka tnat IMD ka la buh jingmaham na ka bynta ka Pathanamthitta distrik jong ka Kerala ha ka 22 tarik, Naiwieng.
Ïa ka jingleit jingleit ha ka por mynmiet la khang pyrshah kaba long hapdeng ka por 7.00 janmiet haduh ka por 6.00 baje mynstep bad la khang ruh na ka bynta ki jingpynsngewbha ha kaba ïadei bad ki kam jngohkai pyrthei kiba kynthup ha ka ban shong lieng ha ki thaiñ ba don ha ki jaka lum jong ka Pathanamthitta distrik haduh mynta ka sngi ka 24 tarik, Naiwieng.
Namar ka jingbteng jong ka jingjur slap ha ka thaiñ, u Myntri jong ka tnat ka pule-puthi u A Namachivayam u la pynbna ba baroh ki skul sorkar bad ki skul jong ki ‘riewshimet kiba don ha Puducherry ki la khanglut naduh ka 22 tarik, Naiwieng.
Kumba la ïathuh ki khubor ba la wan na ki lad pathai khubor, la ong ba ïa ki shuti halor kane la pynbna ruh na ka bynta ki skul kiba don ha ka thaiñ Karaikal.
Kane ka la long ha ka sien kaba ar ba la ai shuti ïa ki skul ha une u bnai na ka daw jong ka jingjur slap.
Ha basdang jong u bnai Naiwieng, baroh ar, kata ki skul bad ki kolej kiba don ha Chennai bad ha Puducherry ki la khang lut namar ka jingbym sangeh jong ka jinghap jong u slap ha kaba kane ka la ktah jur ïa ka Tamil Nadu bad kiwei pat ki thaiñ ba marjan.
Ha kaba ïadei bad kane, ka India Meteorological Department (IMD) ka la phah ïa ki jingbthah ha ka sngi Ba-ar, ha kaba ka la maham jur ïa ki bynta kiba don ha Kerala bad Tamil Nadu na ka jingjur jong u slap.
Ka la don ka jingbuh jingmaham ha kiba bun ki bynta jong ki jylla na ka jingkylla ka suiñbneng ha kaba ka la wanrah ïa ka jinghap slap ha kane ka thaiñ.
Ka Kerala ka la pynkhreh na ka bynta ka jingdon jong ka jinghap u slap uba jur kaba la long hynnin ka sngi bad ka ban ïai bteng haduh hynnin ka sngi, ka 23 tarik, Naiwieng.
