Shillong, Naiwieng 23
Ka All Meghalaya Karate-do Association (AMKA) kan pynlong ïa ka lympung ïalehkai ba la tip kum ka 29th State Karate Championship 2023 ka ban long ha u bnai ban wan ha Indoor Stadium kaba ha Jawaharlal Nehru Sports Complex, Polo.
Ïa kane ka lympung ka ban kyrshan da ka tnat Sports and Youth Affairs jong ka Sorkar Jylla, yn pynlong ha ka 15 bad 16 tarik u Nohprah. Te kumta la khmih lynti ba da ki spah ngut ki nongïalehkai karate naduh ki khynnah kiba hapoh 10 snem ka rta haduh kiba la heh la san (senior) kin wan ïashim bynta ha kane ka lympung ïalehkai kaba ar sngi.
Kane ka lympung ïalehkai kan kynthup ïa ka kumite (sparring) bad ka kata (demonstration) para marwei bad kynhun ha kaba yn phiah ïa ki ha la ki jong ki kyrdan bad ki jingkhia. Kum ban shu pynkynmaw ha ka lympung ïalehkai kaba la lah, ka Sports Authority of India, Shillong ka la khur ïa ka nam lahduh, katba ka AMKA ka la jop ha ka liang ka kynhun jong ki kynthei.
