Shillong, Naiwieng 23
Hadien ka jingjop ïa ka Delhi FC, ka Shillong Lajong FC kan pynkhreh ban ïakhun pyrshah sa ïa ka TRAU FC ha ka sngi Saitjaiñ ha kane ka nongbah
Kane kan dei ka jingïakhun kaba san ha la ïing ha kaba ka Lajong ka la khur jingjop ar sien bad ïakhaid ar sien lem bad kawei shabar na la ïing pyrshah ïa ka Mohamme-dan Sporting.
Ha kane ka jingïaid lynti ha ka lympung ïalehkai I-League 2023-24, ka Lajong ka la kamai 9 point bad ban don ha ka kyrdan basan. Lada kane ka kynhun hapoh ka jingïalam u Bah Bobby L. Nongbet ka lah ban khur biang ïa ka jingjop ha la ïing kan kynjoh sha ka kyrdan balai.
Ha kaba ïadei bad ka jingïakhun, na ka liang ki bor pynïaid ka Lajong ki la pynbna ba ïa kane ka jingïakhun yn sdang ha ka por 2:30 janmiet ha SSA Stadium, Polo. Ka jingsdang ban die ïa ki tiket kan long naduh ka sngi Thohdieng ha kaba ki la paidbah ki lah ban ïoh na Electronic Centre (Police Bazaar), Cafe Shillong (Laitumkhrah) bad kumjuh na SSA Ticket Counter.
Kumba ka paw lyngba ka jingjop ïa ka Gokulam Kerala da 3-1 kol bad ïa ka Delhi FC da 2-1 kol, ka la nangpynkmen ïa ki paidbah nongkyrshan bad la khmih lynti ba kin nangkham bun shuh shuh ka jingwan sakhi ki paidbah ha katei ka jingïakhun.
