Gaza, Naiwieng:
Ki shipai ka Israel ha ka Sngi Balang ki la kam ba ki la lap ia ka jaka shna ‘namding bad kiwei ki tiar pynbthei jong ki lehnoh Hamas bad kumjuh ruh ia ka lynti iaid napoh khyndew shapoh jong ka jakamane Muslim kaba don hapoh ka thaiñ Zeitoun jong ka Gaza.
Kitei ki shipai Israel ki la pyllait ia kawei ka video ha kaba la pyni ia ki shipai jong ka Israel hi kiba dang iaid lynti na katei ka krem shapoh khyndew bad kaba poi sha katei ka jaka shna ‘namding ‘Rocket Lab’ jong ki lehnoh Hamas kaba long shapoh jong ka jaka mane Muslim ha katei ka thaiñ.
Kumta, ha katei ka jaka la iohi ruh ia shibun tylli ki tiar pynbthei jong ki lehnoh Hamas naduh ki ‘namding, ki bom bad kiwei-kiwei kiba ju pyndonkam bad pynmih da ki lehnoh Hamas ha katei ka jaka. Kumjuh ruh la iohi ia kawei ka jaka pruid dak ‘White Board’ kaba don hangtei hapoh bad kaba la don ruh ia ki jingthoh bad ki jingbuh dak, ha kaba la iohi ia ka jingthmu jong ki lehnoh Hamas halor kumno ban pyndonkam bad ban pynher ia ki ‘namding na Gaza ban thombor ia ka Israel.
Namarkata, na ka liang ki bor pyniaid ka Israel ki la pynrem jur halor katei ka jingshem bad ki la ong ruh ba ki lehnoh kim lah ban pyndonkam ia ki jaka ba kyntang bad ba khuid, kum ki jaka ban pynroi ia ki kam thombor.
Dang ha kane ka taiew ba la lah, ki shipai ka Israel ki la pyni ba ki la shem ia kawei ka lynti iaid napoh khyndew kaba poi sha ka hospital Al-Shifa kaba don hapoh Gaza bad kaba long ruh ka hospital kaba heh tam duh hapoh Gaza Strip.
Watla katta, la ong ba ka kynhun lehnoh Hamas ka la kyntait halor katei ka jing pynsaphriang ia kitei ki video halor ka jingshem ia ki lynti iaid napoh khyndew bad kiba poi sha ki jaka paidbah kum ki hospital, ki jaka mane bad kiwei kiwei.
