Chandigarh, Naiwieng:
Ki pulit jong ka Punjab hynnin ka sngi ki la ong ba la kem ïa lai ngut ki briew kiba la shah pynshisha ba ki la donkti bad ka kynhun jong ki lehnoh ka Pakistan. Kane ka jingpyntreikam ka long shi bynta ban ïakhun pyrshah ïa ki lehnoh.
Ha kaba ïadei bad kane, ki pulit ki la ïoh ban kurup ïa phra tylli ki tiar siat bad 30 tylli ki kuli haba la khmih bniah na kine kiba la shahkem, u Director General of Police u Gaurav Yadav u la ong, “Ha ka jingpyntreikam kaba jop la lah ban ïaleh pyrshah halor ki kam pyntriem jong ki lehnoh da ka jingïoh kem ïa lai ngut ki briew kiba la donkti bad ki lehnoh kiba hap hapoh ka jingkhmih bad ka jingpynïaid jong ki ISI jong ka kynhun kaba ha Pakistan. Na ka jingtohkit kaba hashwa la ïoh jingtip ba kine ki briew kiba la shahkem ki dei kiba la donkti bad ki briew ïa kiba mynta ki dang shah set patok ha Sangrur Jail hapoh ka jingshah mudui da ka UAPA,” la ong u Yadav ha ka jingphah khubor ha ka rynsan phah khubor ka X.
“Ki tiar siat ba la ïoh ban kurup ki kynthup ïa phra tylli ki suloi, 9 tylli ki Magazine bad 30 tylli ki kuli ïasiat. Ka la don ka jingujor ejahar ha ka jaka treikam jong ki pulit ha Cantt Bathinda. Ka jingtohkit ha kaba ïadei bad kane ka jingjia ka dang ïaid shakhmat,” la ong u Yadav.
