Shillong, Naiwieng 23
Ka kynhun ki ‘thei ïaleh-kai U-15 ka Jylla ka la khur ïa ka jingjop kaba nyngkong ha ka Women’s U-15 One Day Trophy, hadien ba ka la lah ban pynliem noh ïa ka Nagaland da 7 wiket ha Kolkata.
Kat kum ka khubor ba la pyllait da ka Meghalaya Cricket Association la ong ba ïa kane ka jingïalehkai la pynlong ha ka sngi Ba-ar.
Ha kane ka jingïakhun ka Nagaland ka la kam trai ban tied nyngkong ha kaba la la shah pynkhyl-lem 7 wiket na ka bynta ban kamai 74 run ha ki 35 over. Hynrei haba wan shimti ïa ka pali kaba ar, ka Meghalaya ka la lah ban kynjoh sha ka thong ha ki 15.1 over bad ka dangsah sa 7 wiket.
Ka Diya Biswa ka la long ka nongkawang bol kaba kynsai jong ka Meghalaya ha kaba ka la lah ban khur 3/14 ha ki 7 over, katba ka Jennyfer Fancon ka la khur 2/8 ha ki 7 over bad ka Dejianna M Sangma 2/11 ha ki 7 over.
Haba wan shimti ban tied ïa ka pali kaba ar, ka Anastesia Shullai ka la long ka nongtied kaba khlem shah pynkhyllem ha kaba ka la ïoh 21 run, katba ka Zoya Tasneem ka la tied 11 run.
Kumba ka long mynta ka Meghalaya ka la ïalehkai saw sien ha kane ka lympung ha kaba ka la shah rem lai sien, kynthup ha ka jingïakhun mynta ka sngi pyrshah ïa ka Delhi. Ka jingïalehkai kaba san bad kaba khatduh kan long pyrshah ïa ka Karnataka ka ban long ha ka sngi Saitjaiñ.
