Chandigarh, Naiwieng:
U Myntri ka koit ka khiah jong ka Punjab u Dr Balbir Singh ha ka sngi Ba-ar u la buh ka jingkyrpad ïa ka sorkar kmie ba ka la dei ban pyllait noh ïa ka Ayushman Funds kaba la kot sha ka T.621 klur, la ïathuh ka tyllong khubor.
Kumba la ïathuh ka tyllong khubor, la ong ba ka sorkar Punjab ha ka jingphah khubor, ka la ong ba ka sorkar kmie ka la sangeh ha ka ban pyllait ïa ka jingkyrshan pisa sha ka jylla Punjab hapoh ka jingtreikam jong ka Ayushman Scheme naduh u Nohprah jong u snem 2022, la ïathuh ka tyllong khubor.
Kumba ka dei ban long, la ong ba ka Department of Health and Family Welfare ha Punjab ka la ïohpdiang ïa ka jingai sngewbha kaba nyngkong ba la tip kum ka “Strengthening last mile delivery of drugs: A case study from Punjab” ha ka Global Health Supply Chain Summit kaba la long ha Nairobi naduh ka 14 tarik haduh ka 16 tarik jong u Naiwieng, la ïathuh shuh shuh ka tyllong khubor.
“Lada ki nongmihkhmat na ki 40 tylli ki ri ki kwah ban wan hangne ban khmih bniah ïa ki rukom pyntreikam ha ka rukom ai jingsumar ban bud nuksa ha ki ri jong ki, ka sorkar kmie ka la dei ban ai jingkyrshan ïa ngi bad ka la dei ban pyllait ïa ka pisa na ka bynta ka jingmyntoi jong ki paidbah,” la ong u Dr Balbir Singh, ha kaba u la bynrap shuh shuh da kaba ong ba ka sorkar Punjab ka la phah ruh da ka shithi sha ka sorkar kmie na ka bynta ban shimkhia halor ki Aam Aadmi Clinics kum ka skhim bad ban ym pyndonkam da ka pisa jong ka Ayushman funds na ka bynta kane ka skhim, la ïathuh shuh shuh ka tyllong khubor.
