Shillong, Naiwieng 23
U Director Ketan Anand u la ïaroh ïa ki sienjam jong ka Sorkar India bad ka NFDC ban pynthymmai biang ïa ki phlim hyndai ha kaba u la ong, “Ki la shim ïa ki phlim barim bad pynthymmai biang ïa ki, kane ka dei ka teknoloji kaba biang bha bad ka kam kaba jynjar ha kaba ki hap ban pynthymmai ïa man ka frame.” U la ong ïa kane ha ka jingïakren bad ki lad pathai khubor ha ka 54th International Film Festival of India ha Goa mynta ka sngi.
Ha ka jingkren shaphang ka jingpynthymmai ïa ka phlim ‘Haqeeqat 1’ kaba dei shaphang ki por jong ka thma hapdeng ka China bad India ha u snem 1962, u Anand u la ong ba u kynmaw kumno kane ka phlim ka la pyni ïa ki jinglong jingman ha kito ki por bad ka jingskhem jingmut ki shipai hapdeng ki jingeh kiba bun. U la ong ba ym shym la don kano-kano ka jingmushlia ha ka kam jong u kpa jong u ha kaba ïa ka phlim kaba la pynthymmai ym shym pynkylla bad la pyni ïa kane ka phlim kaba don da ki rong ha ka IFFI 54. “Ym don ba lah ban pynduh ïa ka black & white hynrei kane ka phlim ba don da ki rong ka dei na ka bynta kiba dang kham samla bad khnang ban khring shuh shuh ïa ki,” la ong u Anand. U Ketan Anand u la pynbna ruh shaphang ka jingring ïa ka phlim ‘Haqeeqat 2’ bad ka web series kaba rakhe ïa ki kam jong u Dev Anand ha une u snem ban wan.
“Namar ka jingduna ha ki lad treikam ngi la duh shibun ki jingshon jong ki phlim ha ki por ba la leit,” la ong u Vaibhav Anand. U la ong ba ka long kaba donkam bha ban pynneh ïa ki phlim celluloid bad u la batai kumno kane ka dei ka kam kaba rem dor bha. U la ong shuh shuh ba ka kham bha ban kylla sha ka digital da kaba kdew sha ki lad kiba don ha ki kam digital teknoloji hynrei u la ong ruh ba ngi donkam ban pynneh ïa ki phlim celluloid ba hyndai. U Vaibhav Anand u la ïaroh ïa ki sienjam jong ka NFAI ban pynneh ïa ki phlim da kaba pdiang ïa ki jingeh ha kane ka kam. U Vaibhav u la ong ba lah ban pynlong shuh shuh ïa ki tamasa kum ka IFFI ban ai jingtip shuh shuh shaphang ki phlim hyndai. U la ong ba kane kan ai rynsan ïa ki briew na ki jaka nongkyndong, kiba duna ki lad, ba kin pyni ïa la ka jingtbit bad ba kin ïoh ïa ki lad ban rung ha ki kam shna phlim.
“Ka 54th International Film Festival of India ka dei ka dak jong ka por kaba kyrpang haba ngi ïawan lang ban pyni ïa ka jingseisoh jong ki jingïatreilang – ka jingpyni ïa ki hynñiew tylli ki phlim hyndai ba la pynthymmai hapoh ka National Film Heritage Mission, ba la bei tyngka da ka Tnat Information and Broadcasting,” la ong u Prithul Kumar, Festival Director bad Joint Secretary (Films), ka Tnat I & B.
