Shillong, Naiwieng 23
Ka Croatia ka la lah ban pynthikna ban ïoh rung sha ka Euro 2024 bad ka Wales kan hap ban ïakhun ïa ka ‘play-off’, katba ka France ka la ïakhaid mar 2-2 kol ha ka jingïakhun pyrshah ïa ka Greece.
Wat la ka la rung semi final ha ka World Cup ha ki khatar bnai mynshwa, ka Croatia ka la ïakynduh jingeh ha ka jingïakhun pyrshah ïa ka Armenia ha Zagreb na ka bynta ban ïaknieh rung sha ka European Championship ka ban long ha Germany. Ka jingjop ka long kaba kongsan eh namar ka Wales ka lah ban knieh noh ha ka Group-D.
Hynrei ka jingïoh ban thep kol da ka khlieh lyngba u Ante Budimir ha ka kylla step ka la pynlong ïa ka Croatia ban khur ïa ka jingjop da 1-0 kol, na ka bynta ban pynthikna ban ïoh rung sha ka Euro.
Kham hashwa, ka la Wales ka la ïakhaid mar 1-1 kol ha ka jingïakhun pyrshah ïa ka Turkey ha Cardiff. Ka Turkey ka dei ka kynhun kaba la ïoh rung lypa sha ka Euro namar ka la wan ha ka kyrdan ba hakhlieh jong kane ka group bad kamai 17 point bad ban tam shi point ïa ka Croatia kaba don ha ka kyrdan ba-ar jong kane ka group.
Ka jingïaid lynti ka Croatia ban ïoh rung sha kane ka lympung ïaknieh ka la wan hadien ba ka la lah ban pynliem ïa ka Turkey bad ka Wales ha u Risaw mynta u snem. Hynrei ka jingjop sa ïa ka Armenia ka la pynlong ïa ka kynhun ban ïoh rung sha ka Euro kaba don 24 tylli ki kynhun bad kaba la thmu ban pynlong ha Jyliew bad Naitung jong u snem ban wan.
“Ngi dei hok ban ïoh rung biang sha ka Euro bad ngi dangdon shibun ka por ban pynkhreh na ka bynta ka kynhun ïalehkai ka jong ngi,” la ong u kapten kane ka kynhun u Luka Modric.
Ha Lber, ka Wales kan pynkhreh ïa ka ‘play-off’ na ka bynta ban pynthikna ban ïoh rung biang ha ka sien kaba lai sien kynthih ha ka Euro.
Ka kynhun ka liang pyrshah ka ban ïakhun ïa ka ‘play-off semifinal’ yn sa shim rai ha ka sngi Palei. Ki kynhun kiba kan ïakhun pyrshah ki long ka Finland, Ukraine lane ka Iceland.
Ka kynhun ka ban khur ïa ka jingjop ha ka semi-final kan iakhun final pyrshah ïa ka Poland lane ka Estonia.
Kham hashwa ka Wales kaba la ïalehkai bha ha ka jingïaknieh rung World Cup hadien ba ka la lah ban pynliem ïa ka Ukraine ha ka play-off,
Ka France kaba la ïoh rung lypa na ka Group-B, ka la shah pynïakhaid mar 2-2 kol ha ka Greece kaba la long ha Athens.
U Randal Kolo Muani u la pynkhih jar nyngkong na ka bynta ka France ha ka kylla step. Hynrei ka Greece ka la lah ban pynïakhaid lyngba u kapten u Tasos Bakasetas bad ïa ka kol kaba ar la pynbud da u Fotis Ioannidis.
Watla ka France ka la shah tam ar kol, hynrei u Youssouf Fofana u la lah ban pynphai na ka bynta ban ïakhaid mar ar kol haduh kaba kut ka jingïalehkai
Watla ka Greece, ka la long ka lahduh ha ka 2004 Euro, hynrei kam pat lah ban pynthikna ïa lade, ha kaba ka dangdonkam ban ïaknieh rung ha ki jingïakhun lyngba ka ‘play-off’. Katba ka Netherlands ka la ïoh rung sha ka Euro na kane kajuh hi ka group, hadien ba ka la jop haduh 6-0 kol ïa ka Gibraltar kaba la long ha Faro, Portugal.
Ha ka Group-I, ka Romania bad ka Switzerland ki la ïoh rung sha ka Euro hashwa ba kin ïakhun pyrshah ha Bucha -rest, ha kaba ka Romania ka la jop da 1-0 kol lyngba u Denis Alibec, uba la thep ha ka kylla miet.
Ha kane kajuh hi ka group, ka Israel kan hap ban pynkhreh ban ïakhun ïa ka ‘play-off’, hadien ba ka la jop da 2-0 ha Andorra, katba ka Belarus ka la jop da 1-0 kol ïa ka Kosovo.
Ka jingpynïakap kaba khatduh ïa ki kynhun na ka bynta ka Euro 2024 kan long ha Hamburg ha ka 2 tarik u Nohprah.
