Phyongan, Naiwieng:
Ka North Korea ha ka Sngi Balang, ka la pynbna ia ka jingseisoh ha ka jingpynher bad jingleit buh kor ‘Satellite’ jong ka sha haw-haw, wat hapdeng ka jingmaham na ki tnat bad ki ri bapher haba iadei bad katei ka jingleit buh ‘Spy Satellite’ jong ka ha kane ka por.
Ka United States bad ka South Korea ka la pynrem jur halor katei ka jing-leit buh ‘Spy Satellite’ jong ka North Korea ha katei ka sngi namar la ong ba ka long ka jingpynkheiñ ia ki aiñ bad ki kyndon ba la buh ia ki ri ka pyrthei.
Katkum ki dur ba la pynsaphriang da ki Lad Pathai khubor ka North Korea, la iohi ia ka dur khmat jong u nongialam ka North Korea- u Kim Jong Un, uba la phuh samrkhie bad dap da ka jingsngew kmen ban ioh pyn-urlong ia ka jingthmu ba ka North Korea ka la pyrshang haduh 3 sien hynrei ki 2 sien hashwa ki long kiba khlem seisoh.
Haba iadei bad kane, ka United States ka la pynrem jur halor ka jingiaid shakhmat jong ka North Korea wat hapdeng ki jingmaham ba ym bit ban leit buh ia kitei ki kor Satellite tang na bynta ka kam syntiat.
