California, Naiwieng:
Uwei u khynnah 5 snem la ong ba u la shah dung iap ha la u jong hynmen synrap hadien ka jingiakynad hapoh ka iingsah ha ka nongbah California ha ka Sngi Balang.
Ki bor pyniaid katei ka nongbah, ki iathuh ba kane ka la jia ha ka Sngi Balang jong ka taïew ba la dep. Kitei shi para ki la iashrut bad iania para ma ki hapoh ka kamra shetja ha kaba uwei napdeng kitei shi synrap u la shim da ka tari na katei ka kamra shetja bad dung ia u para. Ki pulit ki la iathuh ba utei u khynnah ba shah dung u la mynsaw jur bad tang mar ia poi hapoh hospital u la khlad noh namar ka jingshitom bad jingmynsaw ka la jur palat bad u la khlad noh hapoh ka hospital ba la pynkit ia u kaba don ha Santa Cruz County.
Ki bor pyniaid jong katei ka County ki la iathuh ba kane ka long ka jingjia kaba shyrkhei tam ba katei ka thaiñ kam ju kham ioh mad namar kum shi para, ki ju don ki jingïashrut bad ki jingiadom hynrei katei ka jingjia ha kane ka por, ka la pynpar ñiangkhriat ia ki paidbah para marjan baroh namar tang na i daw iashrut shi para, utei u khynnah u la nud wat ban shim syndon ia ka jingim jong u hynmen ne para bad kata ruh ka long dang ha katei ka rta ba u dang don tang 5 snem.
Na ka liang ki bor pyniaid ki la phah ia ka jingsngewlem sha ka iing jong kitei ki khynnah kiba mad ia kum katei ka jingjia kaba sngewsih kthang ha kane ka por bad la ong ruh ba namar ka jingleh jong utei u khynnah 5 snem ka long ka bym don jingmut sniew ne jingthmu pyniap hynrei dei tang ka jingdom khyllung kaba la pynlong ia u ban leh ia katei ka kam. Kumta ruh ka ïingbishar kan ym pynshitom ne pynngat kyndon eiei ia utei u khynnah uba dung ia utei uwei pat. Hynrei ka ïingbishar ka la kyntu ia ki kmie ki kpa bad ki bahaiing hasem kiba shong bad utei u khynnah, ba ki dei ban sneng bad pyni ia u ha ka lynti kaba dei khnang ba un lah ban tehlakam ia ka jingdom biej bad ba un da pyrkhat bha shuwa ba un shim ia kano-kano ka rai hadien-habud ioh kum kine ki jingjia kin wan jia biang hadien- habud hapoh ka iing ka sem jongki hi.
Ka ïingbishar ka la kdew ruh da ka kyndon aiñ Penal Code 26 kaba pyni ba pynksan ba u/ka kiba dang hapoh ka 14 snem ka rta, ki dang long kiba lui- lui bad ki bym pat don ia kano- kano ka jingthmu leh kam sniew bad kumta ruh ka aiñ kam pat lah ban ai jing- pynshitom ne pynngat kyndon ia ki katba ka rta ka dang rit.
Haba iadei bad kane ka jingjia, la ong ba ki pulit kim shym la iathuh bniah eiei shuh shaphang katei ka jingjia bad kumba ki bahaiing- hasem ruh kim kwah ban pynpaw eiei hakhmat ki Lad Pathai khubor namar ka long tang ka jingjia shi iing- shi sem.
