Los Angeles, Naiwieng:
Ha kane ka khubor la ong ba ki pulit ki la shem ia ka video ba la ioh ring na ka CCTV Camera jong kawei ka dukan heh hapoh Nike Store kaba don ha Los Angeles, ha kaba ki don kumba 17 ngut ki khynnah kiba la kah dur ialade bad leit ban tuh ia ki jingdie na katei ka dukan kiba la shongdor bad kot $12,000 (Rs.9.9 Lakh) baroh. Kitei ki jingdie ki kynthup ia ki jait jaiñ bapher bapher kiba dei na katei ka kompeni Nike bad kiba long ruh kiba rem dor bad kiba kane ka juk ba mynta ki iabeh bha.
Kane ka la jia ha ka 19 tarik jong une u Naiwieng ha katei ka dukan Nike Store kaba don hapoh ka thaiñ Watts jong ka nongbah Los Angeles. Ki pulit ka Los Angeles ki la iathuh ba katei ka kynhun lute ka kynthup ruh ia 4 ngut ki kynthei bad 13 ngut ki khynnah shynrang kiba naduh 15 haduh 20 snem ka rta.
Katkum ki dur bad video ba la pynsaphriang da ki pulit ka Los Angeles, la iohi ia kitei ki khynnah kiba la leit rung bad rah naphang ia ki synduk bad ki song kat kaba ki kloi ban shim ha katei ka por ka jingleit lute jongki na katei ka dukan heh. La ong ba ki don ruh napdeng jong ki, kiba la pyrshang ban rah bad kyntun palat, ha kaba kitei ki tiar ba ki lute ki la hap bad saphriang kylleng ka dukan ba ki iaid lynti.
Ki nongsakhi kiba iohi ha katei ka sngi, ki iathuh ba kitei ki khynnah hadien ba ki la dep ban lud ia kitei ki jingrah jongki, ki la phet krad noh na katei ka jaka da ki 5 tylli ki kali ba ki rah.
Na ka liang ki bor pyniaid bad ki pulit jong katei ka nongbah Los Angeles ki la pynpaw ia ka jingsngew khia haba iadei bad kane ka jingjia namar ka jingshlur jong ki khynnah-samla ha kane ka juk ba mynta ban leh ia kino- kino ki kam runar ne kam tuh- kam thiem wat ha ka por mynsngi mynshai bad khamtam eh ha ka miet, ha kaba kim don jingtieng – jingsyier shuh ia ki bor pyniaid ne ia ki bor ba dei khmih bad wat ia ki pulit ruh bad ki kloi ban leh ia ki kam ki ban pynhun ia ka mynsiem jongki khlem da pyrkhat ia ka lawei ka ban ktah bad ki jingpynshitom ba kin ngat hadien kata.
