Jowai, Naiwieng 23
Ka Nangbah Mulang ka la khur ïa ka jingjop ha ka Super Division Football Tournament na ka bynta ka Kiang Nangbah Memorial Trophy 2023, hadien ba ka la lah ban pynliem noh ïa ka Lumiawmushai da 3-1 kol ha ka sngi Palei.
Ïa kane ka lympung ïalehkai la pynlong da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh, Jowai.
Wat la kine ki kynhun ki la pyrshang ban ïalehkai bha naduh kaba sdang, hynrei kim shym la lah ban thep kol haduh kaba kut jong ka kylla step. Dei ha ka kylla miet ba ka Nangbah Mulang ka la ïoh ban thep kol nyngkong eh lyngba u Woldrick Susngi ha ka minit kaba 48 bad ia ka kol kaba ar la thep da u Albert Lyngdoh ha ka minit kaba 53.
Hadien lai minit ka Shangpung Lumiawmushai ka la lah ban pynphai kylla lyngba u Mewatki Sungoh. Hynrei ka Nangbah Mulang ka la ïoh biang ban thep ïa ka kol kaba lai bad kaba khatduh lyngba u Chanhok Siangshai ha ka minit kaba 61 na ka bynta ban khur syndon ïa ka jingjop.
