Shillong, Naiwieng 23
Ka kynhun ïalehkai ka Jylla ka la mad ïa ka jingshah rem ha ka Vijay Hazare Trophy 2023-24 kaba long ka lympung ïalehkai ba la pynïaid da ka BCCI, hadien ba ka la shah pynliem noh ha ka Vidarbha da 32 run ha ka sngi Palei ha Jaipur.
Watla ka mad ïa ka jingshah rem, pynban ka Megha-laya ka la pyrshang ban ïakhun tyngeh na ka bynta ban pynlong ïa ka Vidarbha ban kamai tang 243 run bad shah pynkhyllem 9 wiket ha ki 50 over. Hynrei haba wan shimti ia ka pali kaba ar, ka Meghalaya ka la kamai tang 211 run bad shah pynkhyl-lem baroh ki nongtied ha ki 48.1 over.
U Dippu Ch Sangma bad u Kishan Lyngdoh ki la wanphai biang sha kane ka kynhun ïalehkai ka Jylla hadien ba ki la duh ïashim bynta ha ki jingïalehkai T20 jong ka Syed Mushtaq Ali Tro-phy. U Dippu u la lah ban ïalehkai bha ha ka ban kawang bol ha kaba u la khur 4 wiket na ka bynta 43 run ha ki 10 over, katba u Kishan u la khyrwit ïa ka shiteng spah run kaba 57 na ki 75 bol. Kumjuh u Swarajeet Das u la tied 44 run na ki 46 bol. Kine ki long ki jinglah ban kamai run kham bun ha kane ka jingïakhun ryngkat bad u Dippu uba la lah ha ka ban kawang bol na ka bynta ban pynhap wiket.
Kham hashwa u Raj Biswa u la lah ban tied 24 run bad u Nakul Verma (guest player) u la ïoh 34 run, katba u Tanmay Mishra uba long u ‘guest player’ uba dangthymmai, u la ïoh ban tied tang 4 run.
Ha ka pali kaba nyngkong, ka Vidarbha kaba long ka lahduh ha ka Ranji Trophy bad kaba la lah ban sei ïa katto katne ki rangïalehkai kiba la ïadon bynta ha ka Indian Premier League, ka la lah ban ïalehkai bha ha ka ban tied na ka bynta ban buh ïa katei ka thong.
U Dippu u la lah ban pynhap wiket ha ka over kaba nyngkong bad ban khur sa lai wiket ha kane ka jingïakhun. U Akash Kumar Choudhary u la lah ban khur 2/47 ha ki 10 over, katba u Raj (1/21 in 4), Anish Charak (1/43 in 9) bad u Swarajeet (1/48 in 7) ki la lah ban pynhap wiket hapdeng jong ki.
Te kumta ka Megha-laya ka la khmih lynti ban ïalehkai ha ka jingïakhun pyrshah ïa ka Chhattisgarh ha ka sngi Saitjaiñ.
