Shillong, Naiwieng 23
U rangïalehkai power lifting ka Jylla, u Javed Sohtun un pynkhreh ban leit ïashim bynta ha ka jingïakob rah nar ba la tip kum ka Classic & Equipped Bench Press Championship 2023 (National Sub Junior, Junior, Open & Master Men & Women) ka ban long ha Bangalore ha ka 26 tarik tarik mynta u bnai.
Kane ka rynsan ïakob ka long shi bynta ban jied ïa ki nongïalehkai ba kynsai ki ban mihkhmat ïa ka ri India ha ka Commonwealth Games ka ban long ha USA ha u Rymphang jong u snem 2024.
Une u nongrah nar uba shong ha Lumparing, u la long tang mawei ban mihkhmat ïa ka Jylla ha katei ka jingïakob na ka bynta ban ïapyni bor bad kiwei pat ki nongrah nar kiba ban wan na kylleng jong ka ri.
Kum ban pynkynmaw, u Javed u la khur jingjop teng ha ka All India Power Lifting bad kumjuh ha ka NPC Junior Senior Open Men Category Power Lifting kaba la long dangshen mynta u snem ha Dimapur kaba ha Nagaland.
