Chandigarh, Naiwieng:
U Home Guard jong ki pulit ka Punjab u la shah pynïap katba lai ngut kiwei pat ki la mynsaw ha ka por ba ka la mih ka jingïakynad hapdeng ka kynhun ki Nihang Sikh bad ki pulit ha ka sngi Palei mynstep ha Gurdwara Akal Bunga kaba don ha Kapurthala distrik, la ïathuh ki heh pulit. Ka la don ka jingïasiat kaba markylliang hapdeng ki pulit bad ki katto kane ngut ki dkhot jong ka Nihang Sikh, haba ka kynhun jong ki ‘riew bat aiñ ka la poi ha katei ka jaka ban tem ïa ka jingïakynad hapdeng ki ar tylli ki kynhun niam halor ka hukum ban pynïaid ïa ka Gurdwara.
Ki pulit da ka jingbym banse ki la hap ban pynphai ïa ka jingsiat hadien ba ka kynhun jong ki Nihang Sikh, kaba la ïatreilang bad u Baba Man Singh, ka la siat pyrshah ïa ki. Ki pulit ki la ïathuh ba da bun bun snem, ka Gurdwara ka la hap hapoh ka jingkhmih jong u Budha Dal Sant Baba Balbir Singh. Ha kaba ïadei bad kane, ha ka 21 tarik, Naiwieng sa kawei pat ka kynhun jong ki Nihang Singhs kaba dei ka nongbud jong u Baba Man Singh ka la shimti ban pynïaid ïa ka Gurdwara.
Ka kynhun jong u Nihang Sikh kaba long ka nongbud jong u Baba Man Singh ka la khang ïalade hapoh ka Gurdwara hadien ba ka la don ka jingïasiat kaba markylliang bad ki pulit bad kyntait ban mih na katei ka jaka. Ha kaba ïadei bad kane, hadien ar kynta jong ka jingïakren, ki pulit ki la kyntu ïa ki ba kin mih shabar.
U heh pulit u la ïathuh ba u Baba Man Singh bad ki nongbud jong u kin sa mih na ka Akal Bunga Gurdwara, katba kawei pat ka kynhun ka la mynjur ban ym rung ha katei ka jaka. Ki pulit ki la kem ïa 10 ngut ki briew hadien ba la jia ka jingïakynad. U Myntri Rangbah ka jylla u Bhagwant Mann u la pynbna da ka bailutksan kaba T. 1 klur sha ka longïing jong utei u pulit uba la ïap. Ka longïing jong u kan sa ïoh shuh shuh sa T. 1 klur ka Insurance.
