New Delhi, Naiwieng:
Ka sorkar Afghanistan ha ka sngi Thohdieng ka la ong ba ka la khang noh syndon ïa ka Embassy ha New Delhi namar ka jingïai bteng jong ki jingshah pynibor ha ka sorkar India. “Ïa ka Embassy of the Islamic Republic jong ka Afghanistan la pynbna ba la khang noh shi syndon ha New Delhi,” la ïathuh ka Afghanistani Embassy ha India ha ki lad phah khubor.
“Kane ka la treikam naduh ka 23 Naiwieng, ha kaba la ong ba kane ka la long na ka daw jong ka jingïai bteng jong ka jingshah leh donbor ha ka sorkar India. Kane ka rai ka la long hadien ba la don ka jingïakren jong ka jingpyntreikam biang ïa ka hadien ba la sangeh pyntreikam ha ka 30 tarik, Nailur, ha kaba la don jingkyrmen ba ki jingleh jingkam jong ka sorkar India kan sa kylla noh khnang ban lah ban pyntreikam kumba dei ban long,” la ong ka jingthoh ba la phah ha ki lad phah khubor. Ka Afghanistan ka la shah synshar ha ki Taliban ha u snem 2021.
Ki Taliban ki la sdang ban synshar ïa ka ri hadien ba ki shipai bar ri ki la sdang ban mih noh na katei ka ri. Ki dkhot jong ka Taliban ki la shimti ban synshar ïa ka Kabul ha ka 15 tarik, Nailar, 2021.
