Jaipur, Naiwieng:
U Myntri Rangbah jong ka jylla Rajasthan u Ashok Gehlot bad u heh nongïalam jong ka seng Congress u Sachin Pilot ki la kynthoh jur ïa u Myntri Rangbahduh u Narendra Modi ha ka sngi Palei halor ka jingpynmih ïa ka kyrteng jong u Rajesh Pilot uba la khlad ha kaba ïadei bad ka ilekshon Rajasthan tang kumno ban ïalam bakla ïa ka kynhun jong ki Gujjar.
Kumba la pynshisha, la ong ba u Myntri Rangbahduh u Modi ha ka por ba la don ki jingïalap ilekshon ha ka sngi Balang u la ong ba u Sachin Pilot u la shah pyndonkam bakla namar ba u kpa jong u u la shah ïalam teng ha ka longïing jong ki Gandhi ha ki snem 1990.
U Myntri Rangbahduh u la ong ba ka jingshah pynkhlemraiñ jong u Sachin ka la long ka jingñiew beiñ ïa ka kynhun jong ki Gujjar. “Ki jingkren jong u Myntri Rangbahduh ki la ïaid shabar na ka jingshisha,” la ong u Sachin Pilot.
“Ïa u Rajesh Pilot uba la khlad noh, la ai mynsiem da ka Indira Gandhi ban trei ha ki kam saiñ pyrthei bad u la pynïasoh bad ka seng Congress ha ka por ba u dang shakri ïa ka kam ha ka tnat Indian Air Force. U la aiti ïalade na ka bynta ban trei ïa ka kam kum shi bynta jong ka jingim jong u na ka bynta ka seng Congress, u la trei bad shakri bha ïa ki paidbah,” u la ong.
Ha kaba ïadei bad ka jingkren jong u Myntri Rangbahduh shaphang jong u ba u la long shabar jong ka seng Congress bad ha kaba ïadei bad ka ban sa wan jong u ha ki kam saiñ pyrthei, u Pilot u la ong, “Kawei kaba u la ong shaphang jong nga, nga ngeit ba yn ym don mano mano ki ban khuslai shaphang ka ban sa wan jong nga. Ka seng jong ngi bad ki paidbah ki sumar bad khmih bniah bha halor kata.”
U Pilot u la pynpaw shai halor ka jingïateh baskhem kaba u don bad ka longïing jong ki Gandhi.
