Shillong, Naiwieng 24
Kum shibynta ban khanglad ïa ki bar jylla ba kin leh ïa ka khaïi-pateng hapoh ka shnong ka thaw khlem ki kot ki sla kiba biang, ka Dorbar Shnong Laitkor Mawrie-Lumheh ha ka 24 tarik u bnai Naiwieng 2023 ka la pan jingïarap na ka Khasi Hills Autonomous District Council (KHADC) ban khynra Trading License bad Labour License na ki bar jylla kiba trei ba ktah hapoh ka shnong Laitkor.
Ïa katei ka jingleit khynra la ïalam da u Executive Member ka KHADC uba dei khmih ïa ka tnad Khaïi-Pateng, u Bah Gigur Myrthong ha ryngkat bad ki pulit Enforcement ka KHADC lem bad ki nongkitkam ka shnong bad ïa katei ka jingkhynra la sdang na lad Nongkrem ter ter shaduh sha Ksehbilat.
Ha katei ka jingleit khynra la shem ba bun ki dukan ki biang ïa ki kot ki sla kum ka Trading License namar ba ki dei ki dukan jong ki trai jylla, katba ki Labour License jong ki nongtrei bar jylla kim biang satia bad la lap ruh ba ki don ki Khasi kiba kam trai ïa ki dukan jong ki bar jylla.
Na ka liang u Bah Gigur u la ong ba ka jingwan jurip jong ki ha katei ka sngi ïa ka shnong Laitkor ka dei hadien ka jingïoh jingtip ba ki don kita ki bar jylla kiba la wan ban khaïi khlem ki kot ki sla kiba biang. Ha kane ka jingleit khynra la lap ïa ki katto katne tylli ki dukan ki bym satia ïa ka Trading License bad kiba la pynïaid ïa katei ka dukan la kumba 15 snem tam eiei bad ki don ruh ki Khasi kiba la kam trai ïa ki dukan jong ki bar jylla.
“Ka long kaei-kaei kaba sngewsih bad wat na ka liang ka shnong ruh kam don jingtip, na ka liang jong ngi ka tnad, ngin sa shim ïa kaei ka sienjam kaba ngi dei ban shim”, la ong u Bah Gigur.
U Bah Gigur u la ong ba ka tnad ka la batai ïa kitei ki dukan ki bym don ïa ki Trading License ba ki dei ban khang noh shwa ïa ki dukan katba kim pat lah ban pynbiang ïa ki kot ki sla bad ba ki wan mih pat shapoh ka ophis treikam ka KHADC bad hadien kata kin sa shim ïa ki sienjam kiba dei ban shim.
Na ka liang u Rangbah Shnong, u Bah Pynshailang Mawrie u la ong ba ka shnong ka la pyntip sha ka KHADC ba ki don ki bar jylla kiba wan ban khaïi-pateng hapoh ka shnong bad kumjuh ruh ki bun bha ki nongtrei bar jylla ki bym don satia ïa kino-kino ki kot ki sla kiba biang.
U Bah Mawrie u la ong ba wat la na ka liang jong ka shnong ka la ïaleh ban leh da ka bor jong ka Dorbar Shnong hynrei kitei ki briew kim kheiñ snep ne sngap satia ïa ka jingong jong ka Dorbar Shnong ba ki hap ban pyntip sha ka Dorbar Shnong ïa ki briew kiba trei bad ba ki dei ban pynbit pynbiang ïa ki kot ki sla kiba donkam.
U Bah Mawrie u la ong ba lada leit ban khynra tang ka Dorbar Shnong ïa kitei ki dukan, kan sa mih ka jingïapyniñia namar ki don ki katto katne ki trai shnong kiba la ai jaka ban rieh tngen ïa kitei ki bar jylla kiba kam ba ki dei trai ma ki hynrei katkum ka jingtip ka shnong ka tip shai kdar ba ka don ka jingleh ‘benami’ ïa kitei ki kam.
“Na ka liang jong ka shnong nangne shakhmat, ngin buh ka jingpyrkhing bad ka jingmaham kaba tyngeh ba kino- kino kiba trei ba ktah bad kiba khaïi-pateng hapoh u pud u sam jong ngi, kim dei ban ïaid lait na ka bor jong ka shnong hynrei ki dei ban ïatreilang ryngkat bad ka shnong”, la ong u Bah Mawrie.
