Dublin, Naiwieng:
Katkum ki khubor la ong ba ka la mih ka jingkulmar hapdeng ki paidbah bad ki pulit ha ka Sngi Palei bad ka la poi ruh shaduh u pud ka jingiathang kali bad jinglute ia ki dukan hadien ka jingshah dung tari jong kawei ka khynnah rit habar jong ka skul hapoh Ireland.
La ong ba ki pulit ki la hap ban ialeh katba lah ban tehlakam ia ka jingiakynad bad ki paidbah ha katei ka sngi hadien ba ki paidbah ki la thang ia ki kali bad ia kat ki tiar- ki tar kiba don ha katei ka jaka.
Ha katei ka sngi, la iohi ia ki thylliej ding bad ka tdem kaba rben kaba mih na ki thaiñ ba don ka jingkieng O’Connell Bridge nalor jong ka wah Liffey hadien ba ki paidbah ki la thang ia ki kali bad ki bos kiba don ha katei ka jaka namar ka jingshah dung tari jong katei ka khynnah habar jong katei ka skul.
La ong ba ka Dublin ka la ioh mad ia kane ka jingjia kaba kulmar tam ka bym ju jia mynta la da ki snem bad ka daw jong kane ka jingjia ruh ka long hadien ka jingshah dung tari jong ka khynnah 5 snem hapoh Parnell Square East jong ka thaiñ North Central ka Dublin.
Katba ia 2 ngut kiwei pat ki khynnah, 2 ngut kiba la kham heh rta, kawei ka longkmie bad uwei u suba don kti ha katei ka kam, ki la shah pynkit noh sha ka hospital kaba don ha katei hi ka thaiñ namar ki jingmynsaw na katei ka jingjia.
Ki pulit ki la iathuh ba katkum ka jingiathuh jong kito kiba sakhi ia katei ka jingjia, la ong ba ki jaitbynriew nong Ireland, ki ju shah pynthud bad shah pyni bor bha ha kitei ki thaiñ bad kam ju don jingshngaiñ ia ki haba ki dei ban shong ban sah ne ban iaid lyngba na katei ka thaiñ.
Katba tang ha ka jan miet jong katei hi ka Sngi Palei, ki pulit jong katei ka nongbah ki la pyntip ba ka jinglong- jingman ha katei ka thaiñ ka la iaid beit- iaid ryntih bad kam don shuh kano- kano ruh ka jingma ia ki paidbah nongshong shnong ne ki nongleit- nongwan haba iadei bad katei ka jingjia ha katei ka sngi.
