Guwahati, Naiwieng:
Kiba bun na ki nongïalam jong ka seng BJP ha Kokrajhar distrik ki la iehnoh ïa ka seng uwei hadien uwei pat.
Dang shen, u President jong ka seng BJP ha Kokrajhar distrik u Raj Kumar Brahma u la shahweng noh na ka kam jong u kum u President.
Hadien kane, u la leit ban pynïasoh bad ka seng BPF. Nangta ki Secretary jong ka seng BJP ha Kokrajhar kiba kynthup ïa ka Jasmin Brahma bad Subarna Baruah bad ka Secretary jong ka Mahila Marcha jong ka seng BJP ha Kokrajhar ka Dipali Brahma ki la iehnohkam ha ka sngi Palei bad leit ban pynïasoh bad ka seng BPF ha ryngkat 495 ngut ki dkhot jong ka seng BJP, UPPL bad ka seng Congress ha kajuh ka sngi ha ka shlem treikam jong ka seng BPF, kaba don ha Kokrajhar.
Kine ki la shah pdiang bad shah pynkup burom ha ki Vice-President jong ka seng BPF u Kampa Borgoyary bad ka Pramila Rani Brahma kiba long ruh ki symbud nongïalam barim jong ka seng BTC bad Myntri ka Cabinet jong ka Assam.
Ha ka jingïakren bad ki nongthoh khubor, ka Saburna Baruah, ka Secretary jong ka seng BJP ha Kokrajhar distrik ka la ong ba ki la mih na ka seng naba ka BJP kam ju kheiñ kor ïa ka jingkongsan jong ki nongïalam bad ki nongbud jong ka seng kiba kham hapoh.
Ka la ong ba baroh kim da sngew biang ban don hapoh ka seng BJP bad u heh jong ka seng BJP u Arup Kr Dey u la pyndonkam ïa ka seng tang kum ka jinglehkai.
Ka Baruah ka la ong ba ki briew ki kwah ban ïohi ïa ka jingkylla jong ka BTC ba la ïalam da u Pramod Boro hynrei u la pynïaid ïa ka seng BTC da ka jingbthah jong ka seng BJP.
Ka la pynshisha ruh da kaba ong ba u Boro um shym ailad ban trei laitluid hynrei la hap ban bud katkum ka jingpynïaid jong ka seng BJP.
Ha kawei pat ka liang, u Vice President jong ka BPF bad u heh nongïalam barim jong ka seng BTC u Kampa Borgoyary u la ong ba ka jingkhyllem jong ka seng BJP ka la sdang naduh ba ki 500 ngut ki nongbud jong ka seng BJP, UPPL bad Congress ki la leit ban pynïasoh bad ka seng BPF ha ka sngi Palei.
U la ong ba dang shen, ki la don kumba 1000 ngut ki nongkyrshan jong ka seng UPPL, BJP, Congress bad KMSS kiba la leit ban pynïasoh bad ka seng BPF ha ka prokram ba la pynlong lang jong ka Bathou-Kherai ha Kokrajhar.
U la ong ba ka seng BPF kan sa wan ha ka bor synshar khlem kano-kano ka jingartatien naba ka seng BJP bad ka UPPL kim shym la lah ban pynurlong ïa ki jingkular ba ki la khlei sha ki paidbah.
