Shillong, Naiwieng 24
Ka Shillong Lajong FC ka la khmih lynti ban khur ïa ka jingjop balai ha ka I-League ha ka jingïakhun ban long pyrshah ïa ka Tiddim Road Athletic Union FC (TRAU) mynta ka sngi Saitjaiñ ha SSA Stadium, Polo.
Kumba ka paw ka TRAU ka donkam ban khur ïa ka jingjop kaba nyngkong ha kane ka lympung namar ka dang ïoh tang shi point na ki hynriew sien ïakhun bad don ha kyrdan ba shatrai.
U Coach ka Shillong Lajong u Bobby L. Nongbet u la pynpaw ïa ka jingkmen halor kane ka jingïalehkai bha ka kynhun namar ka la lah ban khur jingjop ar sien ha la ïing, hynrei kane ka kynhun kan ym kheiñ sting namar ka TRAU ka lah ban ïalehkai bad ka lah ban pynliem ïa kano kano ka kynhun ha kane ka lympung.
U coach ka TRAU u L. Nandakumar Singh u la pynpaw ba ka kynhun kan hap ban ïalehkai bha lada ka kwah ban jam shaphrang ha kane ka lympung bad khamtam pyrshah ïa ka Lajong kaba don ïa ki nongkyrshan kiba radbah.
Kumba ka paw ka Lajong ka la kamai 9 point bad ka la don ha ka kyrdan ba san hadien ba ka la jop ar sien bad ïakhaid lai sien na ki san ïakhun.
Kane ka jingïalehkai kan sdang ha ka por 2 baje janmiet bad ïa ki tiket lah ban ïoh na SSA Stadium Ticket Counter.
