Shillong, Naiwieng 24
Hadien ka jingshah rem da 1-0 kol ha ka Argentina ha Maracana, ka Brazil ka lah ba shah khate poiñ lane kan hap ban ïalehkai hapoh ka stadium kaba thylli.
Kane ka la wan jia hadien ba mih ki huri-hura ha shwa ban sdang ka jingïalehkai naba ki nongkyrshan jong baroh arliang kynhun ki la thaw jingkulmar bad ban ïakhun pyrshah ïa ki pulit. Ïa ka jingïalehkai ha katei ka sngi la hap ban pynsangeh shwa kumba 30 minit.
Katto katne ki rangïalehkai na baroh arliang kynhun ki la pyrshang ban leit sha ki jaka shong jong ki paidbah na ka bynta ban pynthanda ïa ki. U Emiliano Martinez, uba long u rangapkol ka Argentina u la kynthih sha jaka ba shong ki paidbah na ka bynta ban khanglad ïa ki bor pulit ba kin ym pynmynsaw ïa ki nongkyrshan.
Kat kum ka Article 17 jong ka FIFA administrative rule, “Ki klob kiba pynlong ïa ki jingïalehkai bad ki synjuk ïalehkai kin hap ban shim ïa ka jingkitkhlieh ban pynkhlaiñ ïa ki bor pahara ha shwa bad hadien ba la kut ki jingïalehkai. Lyngba kane la sngewthuh ba ka Brazilian Football Confederation ka lah ban shah pynshitom.
Ki khubor ki ïathuh ba na ka liang ka FIFA ka la thmu mynta ban thung ïa ki kynhun tohkit halor katei ka jingjia.
Wat la ka disciplinary rule jong ka FIFA kam shym la lah ban pynpaw halor ki rai jong ka, hynrei la sngewthuh ba ka lah ban daiñ kuna, kumjuh ban pynïalehkai hapoh ka stadium ka bym shah shuh ïa ki paidbah nongpeitkai bad kumjuh ba kin ïalehkai ha kawei pat ka jaka, lane ban shah khate poiñ.
Kumba ka long mynta ka Brazil, kaba la don ha ka kyrdan ba hynriew na ki 10 tylli ki kynhun kiba ïashim bynta ha ka lympung ïaknieh rung World Cup (qualifying) na South America hadien ba ka la kamai 7 poiñ na ki hynriew sien ïakhun, ka lah ban shah khate poiñ.
