Gangtok, Naiwieng:
U President jong ka Hamro Sikkim Party u Bhaichung Bhutia u la leit ban pynïasoh bad ka seng Sikkim Democratic Front, ba la lamkhmat da u Myntri Rangbah u Pawan Kumar Chamling.
Une u rangïalahkai kynjat bol u la pynbna ba u la rung bad pynïasoh ïa ka seng jong u ka Hamro Sikkim Party bad ka SDF khyndiat bnaih shwa ban pynbna paidbah.
Ha ka sngi Palei u la leit ban pynïasoh bad ka seng ha ka konstitwensi kaba don ha ka shnong jong u ha Namchi, ha kaba la khmih lynti ba un sa ïakhun na ka tiket jong ka seng SDF ha ka ilekshon jong u snem 2024.
U Bhaichung u la ong ba hashwa la ailad ïa ka seng SKM, hynrei ha kine ki saw snem, ka SKM ka la buh shadien ïa ka Sikkim da kumba 15 snem. “Nga panmap na ki paidbah jong ka Sikkim halor ka jingshet kylla jong ka SKM,” u la ong.
U Bhaichung u la kynthoh ïa u Prem Singh Golay ha kaba u la ong ba ka Sikkim ka don ïa u Myntri Rangbah uba tlot ban treikam, ha kaba u la kynnoh ba ka seng SKM ka la die noh ïa ki hok bad ka jinglong ha kine ki saw snem ba la leit jong ka jylla.
U Bhaichung u la pynshisha shuh shuh da kaba ong ba u Golay u la long Myntri Rangbah da kaba die noh ïa ki hok jong ka jylla na sha lyndet hadien ba ka la don ka jingïakhun ïa ka ilekshon ha u snem 2019.
