Imphal, Naiwieng:
Ka kynhun ki shipai ïada ri ka la pynlong ïa ka jingleit khynra ha ki jaka bad ki thaiñ ba kham ap jingma jong ka Imphal West, Kakching, Bishnupur, Thoubal bad Kangpokpi distrik ha kaba ki la don kumba saw tylli ki jaka rieh tngen jong ki runar ki la shah pynjulor, kine ki dei kiba don ha Lumbong Mountain, Haraothel, Kangpokpi distrik.
Ha kane ka jingpyntreikam, ïa kawei ka pistol shna hi ka 9mm ha ryngkat u kuli bad 27 tylli ki tiar pynbthei kiba kynthup ïa ki HE Hand Grenades-10 bad ki Soft Gelatin Sticks-17 tylli la ïoh ban kurup najan ka shnong Haotak Phailen , kaba don ha Bishnupur distrik. Ha kaba ïadei bad kane, ka la don ka jingkhmih bniah ha kaba ïadei bad ka jingïaid jong ki 444 tylli ki kali ha ka NH-37 ban pyntikna ba ki la kit tang ïa ki mar donkam.
Ki shipai ïada ri ki la pyntreikam pyrkhing ïa ki jingpyntreikam ha ki thaiñ ba kham ap jingma ha kaba kane ka jingtreikam jong ki ka long ban ai jingshngaiñ ïa ki kali kiba ïaid ha ki surok.
Ki la don baroh kumba 138 tylli ki Nakas/Checkpoint ba la buh ha kiba bun ki distrik jong ka Manipur, kine ki la long ha baroh ar, kata ha ki jaka lum bad ki jaka them bad ki pulit ki la ïoh ba kem haduh mynta ïa 187 ngut ki briew kiba la donkti ha ki jingïakynad ha kylleng ki distrik jong ka jylla.
