Washington, Naiwieng:
Katkum ki khubor, la iathuh ba uwei u khynnah pule doktor jong ka India u la khlad noh hadien ka jingshah siat hapoh ka kali ba u shong ha ka nongbah Ohio jong ka United States.
U Aaditya Adlakha, u dei u khynnah pule doktor uba dang leit ia ka ‘4th Year’ ha ka Molecular & Developmental Biology Programme ha ka skulbah University of Cincinnati Medical School.
U Aaditya Adlakha u la khlad naduh ki taiew ba sdang jong une u Naiwieng. Dei ha ka 9 tarik u Naiwieng ba ki pulit ka Cincinnati ki la pyntip ba ki la shem ia ka metiap jong uwei u briew na ka kali kaba la leit tynrah ia ka kynroh ha Western Hills Viaduct.
Hynrei ki don pat kiba iathuh ba ha ka por kumba 6:20 ha katei ka step 9 tarik u Naiwieng, ki la ïohsngew ia ka jingriew ki ktang suloi na katei ka jaka bad kumta ki la suba beit ba utei u khynnah pule na India u la shah siat ha ki runar ha ka por ba u dang ñiah ia katei ka kali lade ha katei ka sngi.
La ong ba ha katei ka sngi, dei ki kali kiba iaid lynti na katei ka jaka kiba la iohi ia utei u khynnah pule uba la sahkut bad thiah iap hapoh ka kali jong u ha katei ka jaka. Hadien kata ki la pyntip noh sha ki pulit jong katei ka nongbah khnang ba kin ioh ban sei bad ban pyllait im ruh ia utei u khynnah samla lada ka lad ka dang don.
