Itanagar, Naiwieng:
Ka tnat Pule-Puthi ha Arunachal Pradesh ka la pyntreikam da kaba tyngeh ha kaba ka la weng kam noh ïa palat 250 ngut ki nongtrei, kynthup ki Primary Trained Teachers (PRTs), Trained Graduate Teachers (TGTs), Upper Division Clerks (UDCs), Lower Division Clerks (LDCs), bad Multi-Task Staff (MTS) kiba dang trei hapoh ki Deputy Directors of Secondary Education (DDSEs) ha kiba bun ki distrik jong ka jylla.
Ka Commissioner of Education Amjad Tak ka la pynmih ïa ki hukum, ha kaba la ong ba ki la don ki jingpynkheiñ ïa ki kyndon jong ka tnat. Ïa kine ki hukum la phah ha ka 16 tarik, Naiwieng ha kaba la ong ba kiba bun na ki nongtrei jong ka PRTs, TGTs, UDCs, LDCs, bad ki MTS ki la ïoh ïa ka kam ha kaba ki la rah ïa ki Appointment Order hynrei hadien kane ka la shem ba kine ki long kiba shu thok.
Haba la shem ïa kine baroh, la phah ïa ka shithi sha ka tnat ba dei khmih. Kum shi bynta ban ai jubab halor kane ka jingdkoh treikam, la thaw ïa ka kynhun ka ban tohkit bniah halor kane ka rukom thung kam. Hadien ba ka la don ka jingkhmih bniah, la shem, ba ki Appointment Order kim dei kiba la phah da ka Directorate of Elementary Education. Na ka liang jong ka tnat pule-puthi ka la pyndam noh ïa kine ki Appointment Order na ka bynta ki PRTs, TGTs, UDCs, LDCs, bad MTS.
Ka la don ka jingpyndam noh ïa ka kam jong ki ha kaba ki Deputy Commissioners jong ki distrik bapher bapher ki la shah hukum ba kin wad bniah halor ki briew kiba la shah thungkam da ka lynti kaba beaiñ.
Katkum ka jingphah hukum, la ong ba ki la don kumba 72 ngut ki briew kiba la shah pynduh noh ïa ka kam jong ki ha Changlang distrik, ha kaba la bud da 26 ngut ha Anjaw, 6 ngut ha Kurung Kumey, 1 ha West Siang,bad 3 ngut ha Itanagar Capital Region. Uwei u nongtrei uba trei hapoh ka DDSE u dei uba ha Upper Siang distrik, 18 ngut ha East Siang, 10 ngut ha Longding, 2 ngut ha Tirap, bad 8 ngut ha Upper Subansiri, kine ruh ki la shah pynduh kam.
Ha Lohit bad Lower Siang distrik la shem ba ki la don mar 8 ngut ki briew kiba la shah pynduh kam, katba ha Siang distrik la shem ba ki la don bun ngut bha ha kaba ki la don baroh kumba 101 ngut kiba la shah pynduh kam ha u Education Commissioner.
