Saipung, Naiwieng 24
Ka Mulait United FC ka la jam sha ka kyrdan kaba hakhlieh duh jong ka miej ïakhein poiñ jong ka aïom ïalehkai Super Division Football League ba la pynïaid da ka Saipung Block Sports Association (SBSA).
Kane ka la wan hadien ba ka Mulait United FC ka la lah ban pynliem noh ïa ka Shnongrim SC da 5-0 kol ha ka jingïakhun kaba hynñiew sien ha ka sngi Palei ha madan Lamyrsiang.
Ka Mulait United FC ha ka jingïakhun kaba hynñiew sien ka la lah ban kamai haduh 19 poin. Ka Lamyrsiang SC bad ka Jalaphet Bri Sumer SC ha ka jingïakhun kaba mar hynñiew sien, ki la kamai 16 poin. Ka Latyrke SC ka kamai 10 poin, katba ka Tluh SC bad Narwan SC ki dang kamai mar 10 poin na ki hynñiew sien ïakhun.
Ka Lakasein SC ha ka jingïakhun kaba phra sien, ka la kamai 12 poin, katba ka Jarain SC ka dang kamai tang 3 poin. Ka Shnongrim SC ha ka jingïakhun kaba khyndai sien ka la kamai 12 poin bad ka Mynthning SC ka shym la lah ban kamai.
Ïa ki kol jong ka Mulait United la thep da u Samson Nongrum ha ka minit kaba 9, u Sani Phawa ha ka minit kaba 10 & 65, u Nitezen Pala ha ka minit kaba 28 bad u Wanphira Khongngain ha ka minit kaba 90+1.
Ka jingiakhun mynta ka sngi Saitjaiñ kan long hapdeng ka Latyrke SC bad ka Narwan SC ha ka por 11:30 mynstep, katba ka Lamyrsiang SC ïa ka Jalaphet Bri Sumer SC ha ka por 1:30 nohphai sngi.
