Tinsukia, Naiwieng:
Uwei u bom kawang kti u la bthei hajan ka jaka treikam jong ki shipai ka tnat Army ha Dirak ka jaka kaba hap hapoh ka jingkhmih jong ki pulit ka Kakopathar kaba don ha Tinsukia distrik ha ka miet jong ka sngi Balang ha kaba kane ka la wanrah ïa ka jingtieng jingsyier jong ki nongshong shnong.
Kumba la ïathuh ka tyllong khubor, la ong ba ki la don kumba arngut ki samla kiba la shong ha ka kali arshaka kiba la kawang da u bom kawang kti ïa ka jaka treikam jong ki Army hynrei une u bom u la leit dei ïa ka jar ba la buh kum ka jingker bad sied shadien ïing jong uwei u briew ba la tip kyrteng kum u Konteswar Chetia uba la sah ha marjan katei ka jaka treikam jong ki shipai ha kaba u la bthei ha katei ka jaka.
Kumba la ïathuh u SP jong ka Tinsukia u Abhijit Gurav uba la poi ha katei ka jaka hadien ba la bthei utei u bom u la ong ba ha kane ka jingjia ym shym don mano-mano ruh ki ban mynsaw. U la ong ba kiba la donkti ha kane ka kam thombor kumba la suba ki dei ki lehnoh ULFA. Ki shipai ïada ri ki la pynlong ïa ka jingleit pahara ha katei ka thaiñ ba la jia ka jingjia khnang ban ïohkem ïa ki runar.
