Shillong, Naiwieng 24
Ka rynsan ïakura jong ka 7th Elite Men’s National Boxing Championship kan sdang mynta ka sngi Saitjaiñ ha SAI Indoor Hall kaba ha NEHU.
Ïa kane ka rynsan ïakura ka ban sdang naduh 25 tarik u Naiwieng haduh 1 tarik u Nohprah, yn pynlong da ka Meghalaya Boxing Association (MBA) bad ka Boxing Federation of India (BFI) ha ryngkat ka jingkyrshan lang da ka tnat ïalehkai jong ka Sorkar Jylla.
Ïa kane lympung ïakura yn sdang ha ka por 10:30 mynstep kaban plie da u Myntri ka tnat ïalehkai u Bah Shakliar Warjri kum u kongsan, katba u Hemanta Kumar Kalita, Secretary General ka Boxing Federation of India kum u symbud kongsan.
Kane ka long kawei pat ka lympung kaba la pynlong ha kane ka nongbah Shillong hadien ba la lah ban pynlong ïa ka North East Olympic Games ha u snem ba la lah, kumjuh ka National Ranking Archery Tournament 2023 bad ka Senior National Table Tennis Championship 2022.
Kane ka long ka jingsarong ïa ka Jylla ha kaba ki khlur ïakura na kylleng jong ka ri kin wan ban ïashim bynta ha kane ka lympung ïalehkai kaba heh bad ha kajuh ka por kan long ruh ka jingai mynsiem ïa ki rangïakura kiba na ka Jylla khnang ban ba ki lah ban pynurlong ïa ki jingangnud jong ki ha ryngkat ka jingkyrshan lang da ka Sorkar Jylla. Ka jingpynlong ïa kum kine ki lympung ka long ka jingïarap ia ka Jylla ka ban pynkhreh ban pynlong ïa ka 39th National Games, ha ki snem ki ban wan.
Kin don 300 ngut ki rangïakura ki ban ïashim bynta ha ki 13 tylli ki kyrdan jingkhia bapher bapher ki ban wan na ki Jylla bapher bapher, Union Territory bad na ki kynhun shipai bad kiwei. Ha kane ka rynsan ïakura la pynkhreh ruh ïa ar tylli ki boxing ring na bynta kane ka lympung.
Uwei na ki khlur ïakura ka Jylla u Torak Kharpran uba long u coach jong ka Sports Authority of India u la don ha kane ka nongbah bad un shimti kum u coach ïa ka kynhun ïakura kaba na Arunachal Pradesh.
“Kane ka long ka kabu ksiar na ka bynta ki rangïakura ba kin pyni ïa ki sap ïalehkai,” la ong utei u khlur ïakura. “Kane ka lympung ka long kum ka jingpynkhreh na ka bynta ka Olympic Games. Ka don ka wat kaba ar jong ka jingïaknieh ka ban long ha Italy na ka bynta katei ka Olympics bad ki rangïakura kin hap ban ïalehkai bha khnang ba ki lah ban jam shaphrang ha kane ka jingïakop.”
Katto katne na ki khlur ïakura ki ban ïashim bynta ki kynthup ïa u Shiva Thapa uba la ïalehkai ar sien ha ka Olympic, kumjuh u Amit Panghal uba la khur nam lahduh ha ka Asian Games 2018. Kham hashwa, na ka liang ka MBA ka la pynbna ïa ki rangïakura ki ban mihkhmat ia ka Jylla ha kane ka lympung.
“Na ka bynta ka Meghalaya, ka long ka kabu ksiar ban pynlong ïa kane ka lympung namar ka long kum ka jingai mynsiem ïa ki rangïakura kiba dangkhie dangsan ba kin nangkiew shaphrang,” la ong u Bah Kharpran, uba long uwei na ki coach ka kynhun ïalehkai ka ri India, kaba la ïashim bynta dangshen ha ka Asian Games kaba la long ha China.
