Tel Aviv, Naiwieng:
Ka Egypt ha ka Sngi Thohdieng, ka la pynbna ba hapdeng kane ka jingsangeh iasiat ba 4 sngi jong ka Israel bad ki lehnoh Hamas, kumba 200 tylli ki trok ki ban kit ia ki lad jingiarap naduh ka bam-ka dih, dawai- dashin bad ka umphniang kali, kin ioh ban wan poi sha Egypt man la ka sngi katba ka Israel ka dang ailad ia katei ka kam kumba la iakut bad mynjur bad ka Hamas.
Ha kajuh ka por pat la ong ba ka Israel ka la ailad bad sangeh ia ka thma haduh 4 sngi lynter kumba la iakut bad ka Hamas halor ka jingpyllait ia ki 50 ngut ki briew ba la rahbor da ki lehnoh Hamas na Israel ha ka 7 tarik u Risaw ba ki leit ban hiar thma sha Israel.
U Lamphang ka tnat kam bar ri jong ka Qatar, u Majed Al-Ansari, u la pyntikna halor ka jingpyllait ia ki briew kiba ka Hamas ka la rahbor hynrei um shym la pynshai eiei halor ka jingshngaiñ ia ka leit-ka wan bad ka jingpynpoi ia ki ha ka rukom kaba biang. Katba u la shu pyntip ba ka Hamas ka la kular bad pyntikna ruh ba kan pyllait noh shwa tang ia ki 50 ngut kumba ka la dep kular bad iamynjur bad ka Israel ha kane ka por.
Hynrei, na ka liang ka Israel ruh ka la pynshai ba ka thma kam pat kut satia hynrei ka Israel ka dang ai por 4 sngi ia ki lehnoh Hamas ba kin pyllait noh ia kitei ki 50 ngut shwa kiba ka la rahbor naduh ba sdang ka thma. Kumjuh ruh katba ka Hamas ka dang pyllait ia kitei kiba ka rahbor ha kine ki 4 sngi, kiwei ki ri bad ki tnat bapher jong ka pyrthei ruh ki lah ban phah ia ki jingiarap jongki bad ki ban pynpoi lyngba jong ka Egypt khnang ba yn ioh ban sam sha ki paidbah nongshong shnong ka Gaza.
