Agartala, Naiwieng:
Ha kaba ïadei bad ka jingpyntreikam kaba la pdiang da baroh, ka sorkar Tripura ka la buh ïa ka Pump um ha Bhumiheen Colony ha ka thaiñ Lankamura, kaba don ha ki bynta ba marjan bad ka nongbah Agartala.
Kane ka Pump kan sa pynbiang um sha ki 250 ngut ki nongrep ha ka thaiñ kaba don ki jaka rep ha ki bynta khappud.
Ki la don kumba 100 tylli ki bynta jong ki jaka rep ha ki bynta khappud, bad na ka daw jong ka jingduna um, ki nongrep ha kane ka thaiñ kim lah satia ban bteng ïa ka kam rep jong ki ha baroh shi snem.
U Dipak Majumder, uba long u Mayor jong ka Agartala Municipal Corporation, u la plie paidbah ïa ka Pump um na ka bynta ka jingpyndonkam jong ki paidbah bad ong, “Ka la don baroh kumba T. 35 lak ka pisa ba la dep ban pynlut na ka bynta kane ka Project.
U MLA barim uba na ka thaiñ Lankamura u la trei shitom khlem sangeh ha kaba ïadei bad ka jingpynïoh ban mang na ka bynta kane ka Project ka ban ai jingmyntoi ïa ki nongrep kiba la long ki lanot halor ka jingkyrduh um kumba ka paw na ka khana pateng.
Kine ki jaka kiba don ha ki bynta khappud ki long kiba sboh bad kiba pynkhie bha ïa ki jingthung tang ha ka por Lyiur ba jur ka jinghap jong u slap.
Ha kiwei pat ki aïom kine ki jaka ki la shu shah ieh shrah namar ka jingbym biang ki lad ban pynpoi um sha ki jaka rep. Naduh mynta kine ki jaka kin sa long ki jaka rep ha baroh shi snem.”
