Shillong, Naiwieng 26
Ka India ka la bteng ban khur biang ka jingjop ha ka jingïalehkai pyrshah ïa ka Australia ha ka lympung T20 kaba dang ïaid shakhmat mynta. Ha kane ka jingïalehkai kaba la long ha ka Sngi U Blei ha Greenfield International Stadium, Thiruvanantha- puram, ka India ka la lah ban pynliem noh ïa ka Australia da 44 run.
Haba phai sha ka jing-ïalehkai, ka India kaba la tied nyngkong bad lyngba ka jinglah ban tied bad kamai run jong u Yashasvi Jaiswal uba la tied 53 run na ki 25 tylli ki bol, u Ruturaj Gaikwad uba la tied 58 run na ki 43 tylli ki bol bad u Ishan Kishan uba la tied 52 run na ki 32 tylli ki bol, ka la pynlong ïa ka India ban kamai haduh 235 run na ki 20 tylli ki over bad hap 4 wiket.
Haba beh ïa kane ka thong, ka Australia kam shym la ïoh ka jingsdang kaba paka naba tang hadien ba ka la kamai 58 run ka la duh noh haduh 4 wiket kata ha ka over kaba 7.2. Pynban da ka jinglah ban tied bha u Marcus Stoinis bad u Tim David hapdeng ka la ai jingkyrmen katba ki dang don hapdeng madan, hynrei tang mar ïahap ka wiket jong kine ar ngut, ka Australia ka la bteng biang ban duh ki wiket bad ha kaba kut, ka la lah ban kamai 191 run bad hap haduh 9 wiket na ki 20 tylli ki over.
Kane kan dei ka jingjop kaba ar sien kynthih ïa ka India na ki san tylli ki jingïalehkai T20 bad ka India kan khmih lynti ba ïa ka nam lahduh jong kane ka jingïakhun kan sa rah syndon ha ka jingïalehkai kaba lai, namar kumba ka long mynta, ka la tam lypa da 2-0 bad dang sah sa 3 tylli ki jingïalehkai.
