Shillong, Naiwieng 26
U Badonkupar Synnah u la pynshohbiej ïa ki paidbah nongkyrshan, hadien ba u la lah ban ïoh jingjop ha ka kyrdan ïakura jong ka light welterweight 60-63.5kg fight ha ka sngi kaba ar jong ka 7th Elite Men’s National Boxing Championship ha ka Sngi U Blei ha SAI Indoor Hall, Shillong.
Kane ka lympung ïakura ka ban kut ha ka 1 tarik u Nohprah ba la pynlong da ka Meghalaya Boxing Association ha ryngkat ka Boxing Federation of India ryngkat ka jingkyrshan lang da ka tnat Sports and Youth Affairs jong ka Sorkar Jylla.
Ha kane ka sngi, u Synnah uba la ïakhun pyrshah ïa u Roopesh Shukla uba na Madhya Pradesh, u la khur ïa ka jingjop hadien ba u la tam point bad ban pynhun ïa ki paidbah nongkyrshan kiba la wan ban sakhi ïa kane ka jingïakura. Te kumta u Badon u la long uba nyngkong eh na ki nongïakura ka Jylla ban jam sha kawei pat ka wat jingïakhun.
Ha kane ka sngi kaba ar, la lah ban pynlong haduh 78 tylli ki bouts bad ki rangïakura na kylleng ka ri ki la khmih lynti ban ïalehkai bha na ka bynta ban jam sha kawei pat ka wat jingïakhun bad ruh ban khur takma.
Ha kane ka rynsan ïakura la wan ïashim bynta da ki khlur ïakura jong ka ri, kynthup ïa u rangïakura uba la khur ïa ka takma ksiar ha ka South Asian Games u Sachin na Services uba la ïakhun pyrshah ïa u Vishal Kumar uba na Punjab ha ka 54-57kg featherweight bad u la lah ban khur ka jingjop da kaba tam point.
U rangïakura uba la khur ïa ka takma rupa ha ka Asian Championship 2019, u Ashish Kumar na Himachal Pradesh u la ïakhun pyrshah ïa u rangïakura na Manipur u Kingson ha ka featherweight. Hapdeng kane ka jingïakhun kaba ïakhaid bha, u Kumar u la lah ban khur ïa ka jingjop.
Kiwei pat ki rangïa-kura ka Jylla (Megha-laya), ba kynthup ïa u Kordor Marwein ha ka lightweight 57-60kg, u la shah rem ha u Aditya Nagar na Uttar Pradesh hadien ba u rephri u la hap ban pynsangeh noh ïa ka jingïakhun ha ka wat kaba nyngkong. Kane ka jingpynsangeh ka la wan hadien ba u Kordor u la shah kura tyngeh ha utei u rangïakura uba na UP.
Ha ka 48-51kg flyweight, u Khrawbok Marwein u la ïakhun pyrshah ïa u rangïakura uba na Bihar u Shiv Kant. Watla u la shah kura bad khyllem ha madan, hynrei u la pyrshang katba lah ban ïakhun tyngeh bad ha kaba kut u la shah rem noh hadien ba u la shah tam point ha u rangïakura uba na Bihar.
