Nongstoiñ, Naiwieng 26
Ka kynhun ïalehkai jong ka Pyndengrei SCSC ka la ïoh ban khur ïa ka jingjop ha ka Super Division jong ka lympung ïalehkai kynjatbol ïa kaba la tip kum ka NDSA Premier League Football Tournament 2023-24.
Ka nam jop jong ka Pyndeng-rei ka la wan hadien ba ka la lah ban pynliem noh da 3-0 kol ïa ka Tiehsaw Pengkyllut Sports Club ha ka jingïalehkai pyrshah kaba la long ha ka sngi Saitjaiñ jong ka taïew ha madan NDSA ha Nongpyndeng West Khasi Hills.
Shuh shuh haba phai pat ha ka 1st Division, ka kynhun ïalehkai jong ka New Nongstoiñ SS&CC kala ïoh ban khur ïa ka jingjop da kaba kala pynliem noh da 2-1 kol ïa ka Jaidoh YSA ha ka jingïalehkai pyrshah ha kajuh katei ka sngi.
Ka Football Committee jong ka NDSA, ka la pyntip ba ka jingïalehkai ha ka 27 tarik u bnai Naiweing 2023 kata ha ka Super Division kan long hapdeng ka Mawliehbah Sports Club pyrshah ïa ka Nongpyndeng SS&CC ha ka por 2 baje nohphai sngi katba ha ka 1st Division pat kan long hapdeng ka Lawse Sports Club pyrshah ïa ka Nonglwai II Sports Club ha ka por 12.05 mynsngi.
