Shillong, Naiwieng 26
Ka Pynïar Football Club ka la ïoh rah ïa ka nam lahduh ha ka lympung ïalehkai kynjatbol ba la pynlong da ka Confederation of Ri Bhoi People (CoRP) Raid Madan Kyrdem Circle hadien ba ka la pynliem noh ïa ka Nongrim Nongladew Football Club ha ka final kaba la long ha ka sngi Saitjaiñ ha madan ïalehkai ha shnong Nongpyrdet, Ri Bhoi District.
Ka Pynïar FC ka la lah ban pynliem noh ïa ka Nongrim Nongladew FC lyngba ka jingïashut tie-breaker hadien ba ka jingïalehkai ka la kut noh ha ka jingïakhaid da mar shi kol.
Haba phai sha ka jing-ïakhun, ka long kaba ïa-khaid bad itynnad, ha kaba ki rangïalehkai na baroh ar liang ki la ïakhun tyngeh bad ha kaba ki la ïoh ban pynkhih jar, kane ka la urlong ha kylla miet ba ka Pyniar FC lyngba u Rangdondor Shylla ka la ïoh khyrwit shi kol bad shwa ban kut ka jingïa-lehkai ka Nongrim Nong-ladew ka la ïoh pynphai ïa kane ka shi kol ba la thep da u Wilshai Lyngdoh.
Ïa ka jingïalehkai la hap ban pynïakhun noh da ka tie-breaker ha kaba ka Pyniar FC ka la pynliem ïa ka Nongrim Nongladew bad rah syndon ïa ka nam lahduh.
Ha kane ka sngi u Bah Ransom Sutnga, President ka Mawkhar Sports Club u la long u kongsan ha ka jingdonlang u Bah MD Syiem, Bah Bandary Ryn-tathiang, President ka CoRP Sengkmie, u Bah Pateng Marsing Working President, Bah Karbius Lyngdoh Vice President, ki riew rangbah bad ki dkhot ka seng Raid Madan Kyrdem.
Ïa ka khunsnam trophy ryngkat ka song pisa T.40 hajar la sam da u Bah R Sutnga bad u Bah MD Syiem u la sam ïa ka trophy bad ka song pisa ba T.25 hajar sha ka Nongrim Nongladew FC katba ïa ki medal la sam da u Bah Bandari Ryntathiang bad u Bah Pateng Marsing.
Kham shwa haba ai jingkren, u Bah Sutnga la ïaroh ïa ka jingdon sap ki khynnah na Ri Bhoi bad kaba la sei bun ki khynnah ïalehkai kynjatbol bad u la bynrap ym dei tang ba ki donsap ki don ruh met bad ka rynïeng kaba biang.
U la ong ba dang shen ha ka jingpyrshang ka klob ban jied khynnah, ki don palat 500 kiba shim bynta bad 7 ngut ki khynnah na Ri Bhoi ki la shah jied ban pyntbit ia ha ka jingïalehkai kynjatbol.
Kiwei kiba ai jingkren ki long u Bah MD Syiem, Bah Bandari Ryntathiang kiba la kyntu kynpham ïa ki khynnah ban kiar na ki jingdih ba sniew kiba ktah ïa ka koit ka khiah bad ban pynlut por ha ki jingïalehkai namar ha kajuk mynta ka jingïaleh-kai kynjatbol ka dei kawei ka lad ai kam ai jam ïa ki khynnah samla.
