Shillong, Naiwieng 26
Ka Seng Samla Mawmluh Sports Club ka la ïoh rah ïa ka nam kum ka lahduh jong ka lympung (L) KM Diengdoh Memorial Sohra Football League 1st Division 2023 hadien ba ka la lah ban pynliem noh ïa ka Royal Football Club ha ka jingïalehkai final kaba la long ha ka sngi Saitjaiñ.
Haba phai sha kane ka jingïalehkai final, ka Seng Samla Mawmluh ka la lah ban pynliem noh da 2-0 kol ïa ka Royal FC. ïa kine ar tylli ki kol ka Seng Samla Mawmluh la ïoh ban thep da u Damutskhem Thabah ha ka minit kaba 33 bad u Kenny Majaw ha ka minit kaba 80.
Ha katei ka sngi pynhap pyrda noh ïa katei ka lympung la ïadon lang ki kynrem ki lyndan kiba kynthup ïa u MLA jong ka Shella Constituency u Bah Balajied Kupar Syn-rem kum u Kongsan, Bah Tittosstarwell Chyne, MDC ka Sohra Consti-tuency, Bah Challen Rajee, Bah Arjust Nong-traw bad Kiwei kiwei.
Ki khusnam shimet ba la sam ha kane ka sngi, kata ïa ka nam ‘Man of the Match’ la ïoh da u Damutskhem Thabah (Seng Samla Mawmluh), ka nam Top Scorer ka la leit sha u Samborlang Langte (Royal FC), ka nam Best Goalkeeper ka la leit sha u Jefferson Thabah (Seng Samla Mawmluh), ka nam ‘Player of the Tourna-ment’ ka la leit sha u Arkidon War (Seng Samla Mawmluh).
Haba phai pat sha ka lahduh jong kane ka lympung, ka khusnam kaba ka la ïoh rah ka long ka trophy bad ka song pisa kaba T.40,000 bad ka kynhun kaba wan ba ar ka la ïoh rah ïa ka trophy bad ka song pisa kaba long T.20,000.
