Tel Aviv, Naiwieng:
Ka tnat shipai Israel Defence Forces (IDF) jong ka Israel ha kane ka kynti ka la kam ba ka la ioh ban siat pynkyllon ia u heh nongialam jong ka Hamas- u Amar Abu Jallah hapdeng ka jingther bom jong ka Israel sha Gaza ha kine ki khyndiat sngi ba la leit.
Ki shipai ka Israel ki la pyntikna ruh ba utei u nongialam ka Hamas u la kyllon iap ha ka jingther bom jong ka Israel da ki liengsuiñ thma nalor suiñ.
Katei ka tnat shipai jong ka Israel, ka la iathuh ba u Amar Abu Jallah u la ialam ia ki lehnoh Hamas naduh ka por ba ka kynhun lehnoh Hamas ka la sdang ban leit thombor nyngkong eh ia ka Israel bad haduh kitei ki por ba khatduh ba u la ngat ha ki bom ba la ther da ki liengsuiñ thma ka US sha Gaza.
Nalor kata, ka tnat iada jong ka Israel ka la iathuh ruh ba ka la ioh ban siat bad ther bom sha ki jaka treikam bapher bapher jong ki lehnoh Hamaz naduh ki jaka buh tiar pynbthei, ki jhad ïapom, ki krem lynti iaid kiba don shapoh ka khyndew bad sharud nong bad kumta ter-ter.
