Shillong, Naiwieng 26
U MLA barim ka Mawlai u Bah Process T Sawkmie, uba long ruh u Co-Chairman ka State Development Reform Commission u la leit jngoh ïa ki skhim kiba u la pynïoh ha ka por ba u long kum u MLA na ka bynta ka shnong Umpling Umjathang kaba don hapoh u pud u sam ka Mawlai Konstitwensi, kawei ka skhim ka dei haba shna ïa ka kamra klas bad kawei ka dei ka madan kynjatbol.
Haba ïakynduh ïa u rangbah dong ka Umpling Umjathang u Bah K Kharumlong bad ki dkhot ka excutive committee, u Bah Process, MLA barim u la pynpaw ïa ka jingkmen ban ïohi ïa ka jingïaid ka kam shakhmat haba shna ïa ka kamra klass bad kaba la jan dep artad, kumjuh ka madan phutbol.
Haba ïadei bad ka madan kynjatbol, u pynpaw ba kum u Co Chairman ka State Development Reform Commission un sa ïakren bad ka sorkar ba kin lah ban pyndep ïa ka madan kumba ki angnud, nalor kaba ki la pyntreikam na ka skhim jong u.
Ka jingangnud jong ka shnong Umpling Umjathang haba ïadei bad ka madan ka long ban tei Gallery, ki kynroh bad kiwei de.
U la kyntu ruh ïa ki paidbah nong Mawlai ba kin mih laitluid shakhmat ban pynpaw ïa kino kino ki jingeh kaba ki don, watla um long shuh u MLA hynrei ha i bor barit un pyrshang ban ïarap ïa ki.
