Ka kordit ka bakhraw ka mih haba don kano-kano ka huri-hura la ka dei ha ïing ha sem, ha shnong ha thaw ne hapdeng ki Ri. Ngi ïohi ïa kane lyngba ki nuksa bapher-bapher. Kaba kham khluit ha kine ki sngi ka dei ka thma hapdeng ka Israel bad Hamas kaba la ïaid naduh ka 7 tarik Risaw, 2023 hadien ba ka Hamas na Gaza Strip ka la leit hiar thma ïa ki bynta ba shathie jong ka Israel ha kaba ka la pynïap ym tang ïa ki ’riew paidbah, hynrei ka la rahbor ruh kumjuh. Kumba ka long mynta, kine ki mamla ki don hapdeng ka jingsangeh ban ïakhun na ka bynta saw sngi ban ailad ïa ka Hamas ba kan pyllait kum 50 ngut napdeng kiba la shah rahbor bad ïa ka Israel ba kan pyllait na patok ïa ki nong Palestine kiba la shah kem na ka por sha ka por. Ka jingshah pynïap jong ki briew naduh ka 7 tarik Risaw ha Israel bad Gaza Strip ka long kaba shyrkhei – naduh ki khyllung khynnah haduh ki tymmen ki san – ka thma kam don jingmap satia ïano-ïano.
Ha Meghalaya pat, ngi ïohi ba ka thma ba hakhmat eh mynta ka dei pyrshah ïa u drok uba la rung lajan man la ki ïing ki sem bad ki shnong ki thaw haduh ba ka i kumba ka lawei jong ka jylla ka don hapdeng ka jingdum bad jingtynjuh. Lada kiba bun na ki khynnah rit bad ki samla ki ngop ha ki drok, ngin shim beit ba ka lawei jong ka jylla kam long shuh kaba shai namar ki dei kine ki ban hap kit hap bah ïa ka khia ka shon jong ka ïing ka sem, ka shnong ka thaw bad ka jylla baroh kawei. Namar ka jingngop ha u drok, ki khynnah rit bad ki samla ki pep noh shiteng por na ki jingpule. Ynda ki la khuid na ka jingdih drok, don bun na ki, ki bym kwah shuh ban bteng ïa ki jingpule. Shaei kin poi haba kumta? Khlem ka jingnang jingtip ha kane ka juk, ngin long kiba sahdien ha ki liang bapher-bapher. Khlem ka jingstad bad jingshemphang, ngin ym lah ban angnud palat ha ka ïohkam ïohjam. Ngin hap ban shu hun tang ki kam kiba malu-mala katba kiwei pat kiba la biang ka kyrdan ha ka pule ka dangle kin khur lut ïa ki kam ki baheh. U drok u la pynkulmar thlim ïa ki ïing ki sem bad ka jylla baroh kawei, bad ka la i jynjar ban lait na une u kynjri jong ka jingkordit, jingsngewsih, jingduh jingkyrmen bad jingdum. U drok ruh, um don jingmap satia ïano-ïano la ki dei ki baduk ne bariewspah, khynnah ne samla, kynthei ne shynrang. U sar naphang kat ïa kiba ïoh.
Naduh ka basdang, ngi la bakla kum ka jylla ha ka jingïakhun pyrshah ïa u drok. Mynta u la pyntyrha ha ban da biang. Ngi la kheiñ sting bad mynta u la shong kulai syndon. Ngi la mutdur ba un ym wan rung ha ki ïing ki sem jong ngi bad un bsuh khlieh tang ha kiwei pat ki longïing, hynrei mynta u lajan ïoh phrung ha baroh. Ngi la sdang da ka jingmad kai, bad mynta ngi la kylla kyrni syndon haduh ba ym lah leh eiei wat hapdeng ka jingshah sumar. Ka huri-hura kat shaba phai namar jong une u jingdih mangkariang. Donbok ïa kito ki khynnah bad ki samla kiba dang lait na ka jingshah teh mraw ha u drok. Ka apot kaba kordit ïa kito kiba la ngat namar kam dei kaba suk ban lait na ka jingshah teh ha u kynjri jong ka jingkyrni. Kan shimpor da ki snem ban laitluid biang bad kata ruh ka shong ha ka mon kaba jwat.
Haduh katno kita ki pulit ki lah ban kem ïa ki nongdie drok? Haduh katno kin ïoh jingtip shaphang man la uwei-pa-uwei u nongkhaïi drok? Haduh katno kin lah ban peit kawei-pa-kawei ka kali ne uwei-pa-uwei u briew ne kawei-pa-kawei ka pla? Kam dei kaba suk wat lada ka jingsyntiat bad ka jingïohlum jingtip ka khlaiñ. Ngi dei ban shim ba ki nongkhaïi drok ki kham sian bun shah ban ïa ki pulit lym kumta ym rat da bun ki nongdih drok ha kane ka jylla namar u drok um dei satia uba mih ha Meghalaya. Ki thliew ki syar ki bun. Ki jaka rung jaka mih ki byllai. Ki jaka rieh tngen ki long kumba rep kba. Kat ban da lap lut ïa kita, da ki spah bad hajar ngut ki khynnah bad samla ki la kylla ki nongdih drok ba paka. Bad katba kiwei ki nang saja, ki nongkhaïi drok ki nang muja namar ka pisa ka bun kyrhai. Kiwei ki nang jot bad nang sdot, kiwei ki nang kiew ha ka spah ka phew watla ka dei ka spah bym hok.
