Saipung, Naiwieng 26
Ka Lamyrsiang SCC ka la pynliem ïa ka Jalaphet Bri Sumer ha ka jingïalehkai Super Division Football League ba la pynïaid da ka Saipung Block Sports Association (SBSA) ha madan ïalehkai ka Lamyrsiang.
Ka Lamyrsiang lyngba kane ka jingjop, ka la wan ha ka kyrdan kaba hakhlieh duh jong ka miej ïakheiñ point jong kane ka aiom ïalehkai Super Division da kaba kamai 19 point na ki phra tylli ki jingïalehkai.
Haba phai sha ka jingïalehkai kaba la long ha sngi Saitjaiñ, ka Lamyrsiang ka la lah ban pynliem noh da 3-0 kol ïa ka Jalaphet Bri Sumer.
Ïa kine ki kol jong ka Lamyrsiang la thep da u Phrangsngi Pakem ha ka minit kaba 34 bad 58 bad u Go Goa Hangshing ha ka minit kaba 82.
Haba phai pat sha ka jingïakhun kaba bud, ka Narwan Sports Club ka la pynliem noh ïa ka Latyrke Sports Club da 3-2 kol. Ïa ki kol jong ka Narwan SC la thep da u Blik Phadong ha ka minit kaba 20 bad u Living Phawa ha ka minit kaba 28 bad 48.
Katba ïa ki ar kol jong ka Latyrke SC la thep da u Marchial Nongrum ha ka minit kaba 51 bad u Gadiel Lvouchum ha ka minit kaba 71 lyngba ka penalty.
Kiwei de ki kynhun kiba poi sha khlieh jong ka miej ïakheiñ point ki long ka Mulait United ha ka jingïakhun kaba mar hynñiew sien ka la kamai 19 point katba ka Tluh Sports Club ka dang kamai 10 point.
Ha ka jingïakhun kaba mar phra sien, ka Jalaphet Bri Sumer ka la kamai 16 point, ka Narwan SC ka la ïoh 13 point, ka Lakasein SC ka la ïoh 12 point, ka Latyrke SC ka la ïoh 11 point bad ka Jarain SC ka dang ïoh 3 point.
Katba ha ka jingïakhun kaba mar khyndai sien, ka Shnongrim SC ka la kamai 12 point katba ka Mynthning SC kam pat shym la lah ban ïoh wat tang shi point.
