Gangtok, Naiwieng:
Ka kynhun nongïalam jong ka BJP ha Sikkim ba la lamkhmat da u President jong katei ka jylla u D.R Thapa, ka la pynlong ïa ka jingïalang ha ryngkat ka jingdonlang jong u nongkhih bad nongpynïaid jong ka seng ha ka jylla u Dr Dilip Jaiswal.
Kane ka jingïalang ka la long hadien ba la ïohi ïa kiba bun ki nongïalam jong ka seng ba ki la kyntiap seng kumba ka paw pyrthei.
Kumba la ïathuh ka tyllong khubor la ong ba kiba bun na ki nongïalam jong ka BJP ha Kokrajhar distrik ki la iehnoh ïa ka seng uwei hadien uwei pat.
Dang shen, u President jong ka BJP ha Kokrajhar distrik u Raj Kumar Brahma u la shahweng noh na ka kam jong u kum u President. Hadien kane, u la leit ban pynïasoh bad ka BPF. Sa ki Secretary jong ka BJP ha Kokrajhar kiba kynthup ïa ka Jasmin Brahma bad Subarna Baruah bad ka Secretary jong ka Mahila Marcha jong ka seng BJP ha Kokrajhar ka Dipali Brahma ki la iehnohkam ha ka sngi Palei jong ka taïew ba la lah bad leit ban pynïasoh bad ka BPF ha ryngkat 495 ngut ki dkhot jong ka BJP, UPPL bad ka seng Congress ha kajuh ka sngi ha ka shlem treikam jong ka seng BPF, kaba don ha Kokrajhar.
Kine ki la shah pdiang bad shah pynkup burom ha ki Vice-President jong ka BPF u Kampa Borgoyary bad ka Pramila Rani Brahma kiba long ruh ki symbud nongïalam barim jong ka BTC bad Myntri ka Cabinet jong ka Assam.
Ha ka jingïakren bad ki nongthoh khubor, ka Saburna Baruah, ka Secretary jong ka seng BJP ha Kokrajhar distrik ka la ong ba ki la mih na ka seng naba ka BJP kam ju kheiñ kor ïa ka jingkongsan jong ki nongïalam bad ki nongbud jong ka seng kiba kham hapoh.
Ka la ong ba baroh kim da sngew biang ban don hapoh ka BJP bad u heh jong ka BJP u Arup Kr Dey u la pyndonkam ïa ka seng tang kum ka jinglehkai.
Ka Baruah ka la ong ba ki briew ki kwah ban ïohi ïa ka jingkylla jong ka BTC ba la ïalam da u Pramod Boro hynrei u la pynïaid ïa ka BTC da ka jingbthah jong ka BJP.
Ka la pynshisha ruh da kaba ong ba u Boro um shym ailad ban trei lait-luid hynrei la hap ban bud katkum ka jingpynïaid jong ka BJP.
Ha kawei pat ka liang, u Vice President jong ka BPF bad u heh nongïalam barim jong ka BTC u Kampa Borgoyary u la ong ba ka jingkhyllem jong ka BJP ka la sdang naduh ba ki 500 ngut ki nongbud jong ka BJP, UPPL bad Congress ki la leit ban pynïasoh bad ka BPF ha ka sngi Palei.
U la ong ba dang shen, ki la don kumba 1000 ngut ki nongkyrshan jong ka UPPL, BJP, Congress bad KMSS kiba la leit ban pynïasoh bad ka BPF ha ka prokram ba la pynlong lang jong ka Bathou-Kherai ha Kokrajhar.
U la ong ba ka seng BPF kan sa wan ha ka bor synshar khlem kano-kano ka jingartatien naba ka BJP bad ka UPPL kim shym la lah ban pynurlong ïa ki jingkular ba ki la khlei sha ki paidbah.
Ka phang kaba hakhmat eh jong ka jingïalang ka long ban ïakren halor kiba bun ki mat ba ïadei bad ka seng bad kumjuh ban phai khmat ha kaba ïadei bad ki jingpyntreikam kiba hadien habud khamtam na ka bynta ka jingïakhun ilekshon.
