Bengaluru, Naiwieng:
Ka sorkar Karnataka ka la rai ban map noh ïa ka ram kaba dang sah kaba la kot sha ka T. 389 klur jong ki nongïoh myntoi na ki skhim ‘Kuteera Bhagya’, ‘Bhagya Jyoti’ bad ‘Amruta Jyoti’ ha kaba ki la dei ban ïoh ei ka bording khlem donkam siew ne ka jingmyntoi kaba ki dei ban ïoh nong ha kawei pat ka bynta, la ong u Myntri ka tnat bording u K J George.
Ka la pyndam noh ïa kine ki lai tylli ki skhim da ka jingthmu ban pyntreikam da ka ‘Gruha Jyoti’ Scheme ha kaba la tyrwa ban sam ei ïa ka bording haduh 200 Unit sha ki jaka sam bording ha ka thaiñ.
“Hashwa kane, ki nongïoh myntoi jong ka ‘Kuteera Bhagya’ bad ‘Bhagya Jyoti’ ki la ïoh da kumba 40 Unit bad ki nongïoh myntoi lyngba ka ‘Amruta Jyoti’ ki la ïoh da kumba 75 Unit. Ngi la rai ba kito kiba ïoh 40 unit kin sa ïoh mynta 50 unit shuh shuh sa 10 unit bad kito kiba ïoh 75 unit kin sa ïoh shuh sa kumba 10 per cent,” la ong u George ha ka jingïakren bad ki nongthoh khubor.
“Ka la don shibun ka pisa basah kaba la kot sha ka T.389 klur jong ki nongïoh myntoi jong ki skhim ‘Kuteera Bhagya’, ‘Bhagya Jyoti’ bad ‘Amruta Jyoti’. Nga la ïakren bad u Myntri Rangbah jong ka jylla u Siddaramaiah bad u la rai ban map noh ïa ka,” la ong u Myntri.
U George u la ïathuh ha ki nongthoh khubor ba ka sorkar ka la khot Tender na ka bynta ban buh ïa ki Solar Substation.
