Shillong, Naiwieng 26
Ka Mawponghong Sports Club ka la ïoh rung sha ka semi-final jong ka First Division ka lympung ïalehkai kynjatbol ba la pynïaid da ka Tyrsad Area Sports Association (TASA) ha madan Tyrsad.
Kane ka jingïoh rung sha ka semi-final ka la long hadien ba ka Mawponghong SC ka la lah ban pynliem noh ïa ka Umkseh Sports Club da 2-1 kol ha ka jingïalehkai kaba la long ha ka sngi Saitjaiñ ha madan Tyrsad.
Haba phai sha ka jingïalehkai, ïa ki kol jong ka Mawponghong la ïoh ban thep da u Rikorlang Shangdiar ha ka minit kaba 18 bad u Kynmawlang K Ryngki ha ka minit kaba 22 katba ïa ka shi kol jong ka Umkseh SC la ïoh ban thep da u Rangkitbok Rani ha ka minit kaba 31.
Haba phai pat sha ka jingïakhun jong ka 2nd Division, ka Thainthynroh Sports Club ka la lah ban pynliem noh ïa ka Mawliehpoh Sports Club da 2-0 kol bad ïa kine ki kol la ïoh ban thep da u Iabanlang Kharryngki ha ka minit ba 3 bad u Oping Kharryngki ha ka minit ba 38.
Haba phai pat sha ka jingïalehkai jong ka 3rd Division, ka Nongmadan Sports Club ka la lah ban pynliem noh ïa ka Dewiep Sports Club da 1-0 kol bad ïa kane ka kol la thep da u Timanwell Umdor ha ka minit ba 45.
