Aizawl, Naiwieng:
Ki pulit jong ka Mizoram ki la ai ka jingïaroh bad ka khusnam sha kawei ka nongtrei jong ka IndiGo Airlines kaba la shah pyntreikam ha Lengpui Airport kaba don ha Aizawl halor ka jingïarap jong ka ban ïoh kurup ïa u drok uba la kot sha ka T. 25.49 klur bad ryngkat ki kuli ïasiat, la ïathuh ki heh pulit ha ka sngi Thohdieng.
U heh pulit u la ong ba ki heh pulit, ha ka prokram ba la pynlong, ka la ai ka jingïaroh halor ka jingtrei shitom jong ka H.T. Vanlalruati, kaba dei ka Security Executive ha IndiGo Airlines jong ka Lengpui Airport na ka bynta ka jingshlur jong ka ban leh ïa katei ka kam radbah ha kaba ïadei bad ka jingïarap jong ka ban ïoh ban kurp ïa ki kuli Methamphetamine ba bun ba la ju pyndonkam kum u drok bad kato katne ki kuli ïasiat.
Ka IndiGo ka la pynpaw ka jingsngewnguh ïa ki pulit jong ka Mizoram kiba la ai khusnam bad ithuh ïa kane ka kam babha jong kane ka nongtrei jong ka Airlines. “Ngi dap da ka jingsngew sarong ban don ïa ka nongtrei kaba kum ka Vanlalruati, kaba la aiti bad lenlade bad kumjuh kaba la trei shitom na ka bynta ban ïarap ha kaba ïadei bad ka jingwanrah ïa ka jingshngaiñ hapdeng ki nongleit jingleit bad ka jinglah ban khanglad ïa ki kam sniew. Kane ka jingleh jong ka ka pynpaw ïa ka dor ba ngi trei bad ba ki ïeng skhem. Ngi pynpaw ka jingsngewtynnad bad ka jingsngewkmen halor kane ka kam ba ka la leh”, la ong ka IndiGo Airlines ha ka jingthoh ba ka la phah ha ka rynsan phah khubor ka X.
Kumba ka la jia, la ong ba ka jingïoh ban kurup ïa ki kuli Methampheta-mine kiba la kot sha palat T. 25.49 klur, ka la long na arngut ki nongshong shnong jong ka Myanmar bad ki kuli ïasiat na u nongleit jingleit uba na Manipur.
