Agartala, Naiwieng:
Ka IPFT kaba dei ka seng ba lamkhmat ïa ka sorkar synrop jong ka BJP-IPFT ha Tripura, kan sa pynlong ïa ka jingïalang paidbah kaba heh ha u bnai ban wan kum shi bynta ban pyni bad ban pynpaw ïa ka jingkhlaiñ bor jong ka seng. Wat lada ka la ïasam ha kaba ïadei bad ka bor synshar ha ka jylla bad ka BJP da bun snem, ka IPFT kam shym lah ban pynneh ïa ka jingsynshar ha ki thaiñ jong ki riewlum.
Ha ka jingïakhun ilekshon kaba la dep, la don tang uwei u kyrtong jong ka IPFT uba la jop. U MLA jong ka IPFT u Shukla Charan Noatia hadien u la shah tyrwa da ka shuki Myntri ha ka kynhun Myntri jong ka BJP kaba lai hapoh ka jingïalam jong u Myntri Rangbah u Dr Manik Saha.
Ha kawei pat ka bynta, u President ba mynta jong ka IPFT bad u Myntri barim jong ka Tribal Welfare u Prem Kumar Reang u la shah rem na ka konstitwensi jong u.
Ha kine ki khyndiat sngi ba la leit, u Reang u la pynïaid ïa ka jingïalang jong ka Central Executive Committee jong ka seng na ka bynta ban ïakren halor ki mat ba ïadei bad ki rukom pyntreikam jong ka seng na ka bynta ki por ban sa wan.
“Ha ka jingïalang ba la pynlong, la ïakren bad ïamir jingmut ha kaba ïadei bad ki jinglong jingman jong ki kam saiñ pyrthei mynta bad ban wad ki lad ki lynti ha kano ka rukom ba ka seng ka la dei ban leh na ka bynta ban wanrah ka jingmyntoi sha ki paid riewlum. Ngi la rai ban pynlong ïa ka jingïalang paidbah kaba heh ha u bnai ban wan, ha kaba ngin sa pynbna ïa ki rukom treikam jong ngi.”
Ka IPFT ka la paw bha hapdeng ka kynhun jong ki riewlum na ka bynta ka jingdawa jylla na ka bynta ka thaiñ kaba hap hapoh ka jingkhmih jong ka Tripura Tribal Areas Autonomous District Council.
