Nongstoiñ, Naiwieng 27
Ka kynhun ïalehkai jong ka Mawliehbah ka la khur ïa ka jingjop ha ka lympung ïalehkai NDSA Premier League Football Tournament 2023-24, hadien ba ka la lah ban pynliem noh ïa ka Nongpyndeng da 2-0 kol ha ka Lah Sngi U Blei ha madan NDSA kaba ha Nongpyndeng.
Kane ka nam jop ka la wan urlong lyngba u Liverwell Nongphud bad u Bleskhardial L. Mairang na ka bynta ban pynlong ïa katei ka kynhun ban khur ïa ki lai point.
Watla kine ki kynhun ki la pyrshang ban ïakhun tyngeh naduh kaba sdang, hynrei kim shym la lah ban pynkhih jar haduh kaba kut jong ka kylla step. Hadien ba la bteng ïa ka jingïakhun jong ka kylla miet ba ka Mawliehbah la ïoh ban pynkhih jar nyngkong eh lyngba u Liverwell Nongphud ha ka minit kaba 74. Tang hadien lai minit kane ka kynhun ka la pynbud biang ïa ka kol kaba ar lyngba u Bleskhardial L.Mairang na ka bynta ban khur syndon ïa ka jingjop.
Haba phai pat sha ka 1st Division, ka Lawse SC ka la jop da 2-0 kol ïa ka Nonglwai II.
Na ka liang ka Football Committee ka NDSA ka la pyntip ba ka jingïalehkai ha ka sngi Ba-ar ha ka 1st Division kan long hapdeng ka Marskuiñ SC pyrshah ïa ka Porshangbet SC ha ka por 12:05 mynsngi, katba ha ka Super Division ka Khliehmawlieh YC kan ïakhun pyrshah ïa ka Mawlarshong SC ha ka por 2 baje janmiet.
