Jowai, Naiwieng 27
Ki saw kol ba la thep da u Precious Tang ki la biang pura ïa ka Khimusniang kan khur jingjop ha ka sien kaba nyngkong eh ha ka lympung ïalehkai Super Division Football Tournament ba la pynïaid da ka West Jaiñtia District Sports Association (WJDSA).
Kane ka la wan hadien ba ka la lah ban pynliem ïa ka Mynthong da 4-2 kol ha ka lah sngi U Blei ha Kiang Nangbah Stadium kaba ha Jowai.
Ha kane ka jingïakhun ka Khimusniang ka la lah ban ïalehkai bha naduh kaba sdang ha kaba ka la ïoh ban pynkhihjar tang ha ka minit kaba 4 lyngba u Precious. Hadien katto katne por ka Mynthong ka la lah ban pynphai kylla shi kol lyngba u A. Khan ha ka minit kaba 15.
Hadien shiteng kynta u Precious u la pynbud biang ïa ka kol kaba ar ha ka minit kaba 35. Hashwa ban kut ka jingïalehkai jong ka kylla step, ka Mynthong ka la thep biang sa shi kol lyngba u Pynkhreh Talang ha ka minit kaba 40 na ka bynta ban ïakhaid mar 2-2 kol.
Hadien shi minit ba la bteng biang ïa ka jingïakhun jong ka kylla miet, u Precious u la thep ïa ka kol kaba lai ka jong u na ka bynta ban khur syndon ïa ka hat-trick. Hashwa ban wai artad une u rangïalehkai shakhmat u la thep biang ïa ka kol kaba saw ha ka minit kaba 90+2 na ka bynta ban khur syndon ïa ka jingjop.
